ރައީސް އިބްރާހީމް މުޙައްމަދު ޞާލިޙްގެ ސަރުކާރުން ކުރިޔަށް ގެންދާ ތަރައްގީގެ މަޝްރޫއުތަކުގައި ހިމެނިގެން ތަރައްގީ ކުރަންފެށި ތ. ގުރައިދޫ ބަނދަރުގެ މަސައްކަތް ނިމިފައިވާ ކަމަށާއި، އަދި ށ. ފޯކައިދޫ ބަނދަރުގެ މަސައްކަތް ވެސް ބާރަށް ކުރިޔަށް ދާކަމަށް ސަރުކާރުން ހާމަކޮށްފިއެވެ.

މި މަޝްރޫއުތަކުގެ ކޮންޓްރެކްޓަރ އެމްޓީސީސީން ބުނީ، ގުރައިދޫ ބަނދަރުގެ މަސައްކަތް އެއްކޮށް ނިންމާލާފައިވާއިރު، އެ މަސައްކަތުގެ ދަށުން، 18،086 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 6399 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 329 މީޓަރުގެ ސަރަޙައްދެއްގައި އެއްގަމުތޮށި ލުމާއި، 208 މީޓަރުގެ ސަރަހައްދެއްގައި ބޭރުތޮށި ލުމާއި، 125 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 19 މީޓަރުގެ ސަރަހައްދެއްގައި ގްރޮއިންސް ޖެހުމާއި، 1710 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި އަދި މަގުބައްތި ހަރުކުރުމުގެ މަސައްކަތް ވެސް ނިންމާލެވިފައިވާ ކަމަށެވެ.

މި މަޝްރޫއުގެ އަގަކީ 46 މިލިއަން ރުފިޔާއެވެ.

ސަރުކާރުން ފަށާފައިވާ ށ. ފޯކައިދޫ ބަނދަރު ތަރައްގީ ކުރުމުގެ މަޝްރޫއުގެ މަސައްކަތުގެ 62 ޕަސެންޓް މަސައްކަތް މިހާރު ނިންމާލެވިފައިވާ ކަމަށް ސަރުކާރުން މިއަދު ވަނީ ބުނެފައެވެ. މަސައްކަތުގެ ކޮންޓްރެކްޓަރ އެމްޓީސީން މިއަދު ބުނީ މަޝްރޫއުގެ ބޮޑުބައެއް ނިމިފައިވާއިރު ބޮޑުހިލައިގެ ފަސްވަނަ ޝިޕްމަންޓް މިހާރުވަނީ ޕްރޮޖެކްޓް ސައިޓަށް ގެންދެވިފައި ކަމަށެވެ.

މި މަޝްރޫއުގެ ދަށުން 100 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 507 މީޓަރުގެ ސަރަޙައްދެއްގައި ބޭރުތޮށި ލުމާއި، 2320 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ނެރުބައްތި އާއި މަގުބައްތި ހަރުކުރުމުގެ މަސައްކަތްވެސް ކުރިޔަށް ދާނެކަމަށް އެކުންފުނިން ހާމަކުރެއެވެ.

މި މަޝްރޫޢަކީ 64.6 މިލިއަން ރުފިޔާގެ މަޝްރޫޢެކެވެ.

މި ސަރުކާރުންދަނީ އަތޮޅު ތެރޭގެ ގިނަ ރަށްތަކެއްގެ ބަނދަރުތައް ހެދުމާއި ގޮނޑުދޮށް ހިމާޔަތް ފެނާއި ނަރުދަމާގެ މަސައްކަތް ފަދަ އަތޮޅުތަކުގެ ތަރައްގީގެ ގިނަ މަސައްކަތްތަކެއް ބާރު ސްޕީޑުގައި ކުރަމުންކަން ފާހަގަ ކޮށްލެވެއެވެ.