އެމްޓީސީިސީގެ ހުނަވަރު ޕްރޮގްރާމް ނިންމި 52 މީހަކަށް ވަޒީފާދީފިއެވެ.

އެމްޓީސީސީން ބުނީ ހުނަވަރު ޕްރޮގްރާމްގެ ދަށުން 43 ބަސް ޑްރައިވަރަކު ތަމްރީނުކޮށްފައިވާ ކަމަށާއި އޭގެ ތެރޭގައި އަންހެން ހަތަރު ޑްރައިވަރަކު ހިމެނޭ ކަމަށެވެ. ބަސް ޑްރައިވަރުންގެ އިތުރުން ހަ އެސިސްޓެންޓް ސައިޓް ސުޕަވައިޒަރުންނާއި ތިން މެރިން މެކޭނިކުުން މި ފަހަރުގެ ތަމްރީނު ޕްރޮގްރާމް ފުރިހަމަކޮށްފައިވެއެވެ.

އެމްޓީސީސީގެ ހުނަވަރު ޕްރޮގްރާމް ފުރިހަމަކުރި މީހުންނަށް ވަޒީފާ ހަމަޖައްސައިދީ އެކަމުގެ ލިޔުން ހަވާލުކޮށްދެއްވީ އެމްޓީސީސީގެ ސީއީއޯ އާދަމް އާޒިމް އެވެ.

ވަޒީފާ ޙަވާލުކުރުމުގެ ޙަފްލާގައި ދެއްކެވި ވާހަކަފުޅުގައި އާޒިމް ވިދާޅުވީ، "ކްރިމިނަލް ރެކޯޑެއް އޮތަސް، އެ ކަން ތަންފީޒުކޮށްފައި އޮތިއްޔާ ވަޒީފާ ލިބޭނެ. ނަމަވެސް އެމްޓީސީސީގެ އުސޫލުތަކާއި ގަވައިދުތަކާ ހިލާފުވެ، މިކޮޅުން ދޭ ތަމްރީނުތަކަށް އެއްބާރުލުން ނުދެންޏާ ވަޒީފާއަކު ނޫޅެވޭނެ،" ކަމަށެވެ.

ހުނަވަރު ޕްރޮގްރާމްގެ ބައިވެރިން މަސައްކަތް ކުރަނީ އެ މީހެއްގެ ދާއިރާއަކާ ގުޅޭ ސައިޓެއްގަ އެވެ. އެ ބައިވެރިން ތަމްރީނުކޮށްދެނީ އެމްޓީސީސީގައި ތަމްރީނު ލިބިފައިވާ ތަޖުރިބާކާރު މުވައްޒަފުންނެވެ.

މާލެ ސަރަހައްދުގައި ބަހުގެ ހިދުމަތްދޭ އެމްޓީސީސީން ފަށާފައިވާ ހުނަވަރު ޕްރޮގްރާމުގައި ބައިވެރިވާ މީހުންނަށް ކޮންމެ މަހަކު ވެސް 5،000 ރުފިޔާގެ އެލަވަންސެެއް ދޭއިރު މި ޕްރޮގްރާމުގައި މިހާރު ވެސް 32 މީހަކު ދަނީ ބައިވެރިވެ ތަމްރީނުވަމުންނެވެ. އެމްޓީސީސީން ވަޒީފާ ދިން 52 މީހުންނަކީ މިދިޔަ އަހަރު އެ ކުންފުނިން ފެށި ހުނަވަރު ޕްރޮގްރާމުގައި ބައިވެރިވެ ތިން މަސް ދުވަހުގެ ތަމްރީން ފުރިހަމަކޮށްފައިވާ މީހުންނެވެ.