ހުޅުމާލޭގައި ހިންގާ ޚާންޖީ ރެސްޓޯރެންޓްގެ ތެރޭގައި ވަޅިން ހަމަލާދީ ބަންގްލްދޭޝް ވެއިޓަރު އެމްޑީ ޝަމީމް މަރާލި މައްސަލާގައި އިތުރު ދެހެކިންގެ ހެކިބަސް ނަގައިފިއެވެ.

މި މައްސަލާގައި ހައްޔަރުކޮށް ދަޢުވާ އުފުލާފައިވަނީ ޕާކިސްތާނުގެ މުޙައްމަދު އާބިދުގެ މައްޗަށެވެ. އޭނާގެ މައްޗަށް ޤަސްދުގައި މީހަކު މަރާލުމުގެ ދަޢުވާ ދަޢުލަތުން ވަނީ އުފުލާފައެވެ. މި މައްސަލައިގެ ފުރަތަމަ އަޑުއެހުން ބާއްވާފައިވަނީ 26 ޖޫން 2022 ގައެވެ. އެ އަޑުއެހުމުގައި އާބިދު ވަނީ ދައުވާއަށް އިންކާރު ކޮށްފައެވެ. އަދި އެޙާދިސާ ހިނގާފައިވަނީ ނަފްސުގެ ދިފާޢުގައި ގެނައި ޙަރަކާތެއްގެ ތެރެއިން ކަމަށް އާބިދުވަނީ ބުނެފައެވެ. އެހެންކަމުން ޤަސްދުމަރުގެ ދަޢުވާއަށް އިންކާރު ކުރާކަމަށް އާބިދު ބުނެފައިވެއެވެ.

އެދުވަހުގެ އަޑުއެހުމުގައި ދަޢުލަތުންވަނީ ހެކި ހާމަކޮށްފައެވެ. މި މައްސަލާގައި އާބިދާ ދެކޮޅަށް ދަޢުލަތުން 11 ހެކިން ހުށައަޅާފައިވެއެވެ. އޭގެތެރެއިން 4 ހެއްކެއްގެ ހެކިބަސް މީގެ ކުރިން ބޭއްވި އަޑުއެހުމެއްގައި ނަގާފައިވެއެވެ. އެއީ ޚާންޖީ ރެސްޓޯރަންޓްގައި މަސައްކަތް ކުރާ ޕާކިސްތާނު ރައްޔިތުން ތަކެކެވެ.

މިއަދުވެސް 2 ހެއްކެއް ހާޒިރުކޮށް ހެކިބަސް ނަގާފައިވެއެވެ. އެއީ ޝަމީމް ގޮވައިގެން އެމްބިއުލާންސްގައި ހޮސްޕިޓަލަށްދިޔަ މުހައްމަދު ޔޫނުސްއާއި، ރެސްޓޯރަންޓްގައި މަަސައްކަތްކުރި ޒައިން އަލީއެވެ. އެ ދެމީހުންވެސް ބުނެފައިވަނީ ޝަމީމްގެ މެޔަށް ލިބިފައިވާ ޒަހަމްތައް ނުފެންނަކަމަށެވެ. އަދި ޒަހަމަކަށް ފެނިފައި ވަނީ ޝަމީމްގެ މޫނުގައި ހުރި ޒަހަމް އެކަނި ކަމަށް ދެމީހުންވެސް ވަނީ ބުނެފައެވެ.

މައްސަލަ ބައްލަވާ ގާޟީ އިސްމާއިލް ޝަފީއު މިއަދު ވިދާޅުވެފައި ވަނީ މިމަހުގެ 24 އަދި 25 ވަނަ ދުވަހު ބާކީތިބި ފަސް ހެކިންގެ ހެކިބަސް ނަގައި ނިންމާނެ ކަމަށެވެ.

ބަންގްލަދޭޝްގެ ބްރަހްމަންބާރިއާ ސިޓީގެ ޗަމްޕޫރް ވިލެޖަށް ނިސްބަތްވާ ޢުމުރުން 29 އަހަރުގެ އެމްޑީ ޝަމީމަށް ހުޅުމާލޭގެ ޚާންޖީ ރެސްޓޯރެންޓްގައި މިދިޔަ އޭޕްރީލްމަހުގެ 16 ވަނަދުވަހު ހަވީރު ވަޅިން ހަމަލާދީ މަރާލި މައްސަލައިގައި އެރޭ ދަންވަރު ހައްޔަރުކޮށްފައިވަނީ އެ ރެސްޓޯރެންޓްގައި ޝެފެއްގެ ގޮތުގައި މަސައްކަތްކުރާ ޕާކިސްތާނުގެ ރައްޔިތެއް ކަމަށްވާ އުމުރުން 26 އަހަރުގެ މުހައްމަދު އާބިދެވެ.

ޢާބިދުގެ މައްޗަށް ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 5 ވަނަ މާއްދާގެ (ހ) އާ ޙަވާލާދީ، އެމާއްދާގެ (ނ) ގެ ދަށުން، ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ ދަޢުލަތުން ކްރިމިނަލް ކޯޓުގައި އުފުލާފައިވަނީ 15 ޖޫން 2022 ގައެވެ. މި ކުށުގެ އަދަބަކީ މަރުގެ އަދަބެވެ. އަދި ކުށުގައި ބައިވެރިވެއްޖެކަން ސާބިތުވެއްޖެނަމަ 15 އަހަރާއި 25 އަހަރުގެ ޖަލު ޙުކުމެއް އަންނާނެއެވެ.

ޝާހިން މަރާލުމަށްފަހު ފިލައިގެން އުޅެނިކޮށް އާބިދު ހައްޔަރުކޮށްފައިވަނީ ހުޅުމާލޭ ފޭސް-2 ގެ ބީޗް ސަރަޙައްދުންނެވެ. އެ މައްސަލައާ ގުޅިގެން އިތުރުމީހަކު ހައްޔަރުކޮށްފައިނުވާކަމަށް ފުލުހުންވަނީ ބުނެފައެވެ.

ޕާކިސްތާނުގެ މުހައްމަދު އާބިދު، ބަންގްލަދޭޝްގެ މީހާއަށް ވަޅިން ހަމަލާދީފައިވަނީ އެ ރެސްޓޯރެންޓް ބަދިގެ ތެރޭގައި ހިނގި ޒުވާބެއްގެ ތެރެއިންނެެވެ.