ރ. އަލިފުށީގައި ސަރުކާރުން ތަރައްގީ ކުރާ އެއަރޕޯޓުގެ މަސައްކަތް ރަސްމީކޮށް މިއަދު ފަށައިފިއެވެ.

އެރަށުގައި މިއަދު ބޭއްވި ރަސްމިއްޔާތުގައި މަޝްރޫއުގެ އަމަލީ މަސައްކަތް އިފްތިތާހު ކޮށްދެއްވީ، އަލިފުށީ ދާއިރާގެ މަޖިލީހުގެ މެމްބަރު، މުހައްމަދު ރަޝީދު ހުސައިންއެވެ. މި ރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމާއި އަލިފުށީ ކައުންސިލްގެ ރައީސް، އާދަމް އިމްރާންގެ އިތުރުން އެމްޓީސީސީގެ އިސްވެރިން ބައިވެރިވެވަޑައިގެންނެވިއެވެ.

މި މަޝްރޫއުއާއި ގުޅޭ ގޮތުން އެމްޓީސީސީއިން ބުނީ، އަލިފުށީ އެއާޕޯޓް ތަރައްގީ ކުރުމުގެ މަސައްކަތް ފެށިގެން ދާނީ މިހާރު ފެށިފައިވާ އެރަށުގެ ބިން ހިއްކުމުގެ މަސައްކަތް ނިމުމުން ކަމަށެވެ.

އެރަށުގައި ހިންގާ އެއާޕޯޓް ތަރައްގީ ކުރުމާއި، ބިން ހިއްކުމުގެ މަޝްރޫއުގެ ދަށުން 50.5 ހެކްޓަރުގެ ބިން ހިއްކުމާއި، 2871 މީޓަރު ސަރަހައްދެއްގައި ރިވެޓްމެންޓު ޖެހުމާއި، 480 މީޓަރުގެ ސަރަހައްދެއްގައި ގްރޮއިން ޖެހުމުގެ މަސައްކަތް ކުރިއަށް ގެންދިއުމަށް ވަނީ ހަމަޖެހިފައެވެ. މީގެ އިތުރުން 665 މީޓަރު ސަރަހައްދެއްގައި ފެންސެއް ޖެހުމުގެ މަސައްކަތް ކުރުމަށް ވަނީ ހަމަޖެހިފައެވެ.

މީގެ އިތުރުން ރަންވޭ އަކާއި، އޭޕްރަންއަކާއި، ޓެކްސީވޭއަކާއި، ފަޔާ ޕެޑުގެ އިތުރުން މަގު ހެދުމަށް މި މަޝްރޫއުގެ ދަށުން ވަނީ ހަމަޖެހިފައެވެ. އަދި އެއާފޯލްޑް ލައިޓިން ސިސްޓަމް ހަރުކުރުމާއި، ނެތު ބައްތި ހަރުކުރުމާއި، އަލިފާން ނިއްވާ އިކުއިޕްމަންޓު ހަރުކުމުގެ މަސައްކަތް ކުރުމަށް ވަނީ ހަމަޖެހިފައެވެ.

އަލިފުށީ ބިން ހިއްކުމާއި އެއާޕޯޓް ތަރައްގީ ކުރުމުގެ މަޝްރޫއުއަކީ، 451.61 މިލިއަން ރުފިޔާގެ މަޝްރޫއުއެކެވެ. މި މަޝްރޫއުގެ އިތުރުން އެ ރަށުގައި ހޮސްޕިޓަލަކާ، އެ ރަށު ފަޅު ތެރޭ ރިސޯޓެއް ތަރައްގީ ކުރަން ވެސް ސަރުކާރުން ވަނީ ނިންމާފައެވެ.