އދ. އެއްލައިދޫ ރިސޯޓްގައި މަސައްކަތްކުރި ސްރީލަންކާ ދެ މީހެއްގެ ދެމެދުގައި ހިނގި މާރާމާރީއެއްގައި ވަޅިން ހަމަލާދީ ޕަތުމް ދިލްޝަން ޑި ސިލްވާ އަގަމްޕޮޑި މަރާލި މައްސަލައިގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި މިއަދު ކުރިއަށް ގެންގޮސްފިއެވެ.

މި މައްސަލައިގައި ދަޢުލަތުން ދަޢުވާ އުފުލާފައިވަނީ ސްރިލަންކާ ރައްޔިތެއް ކަމަށްވާ ޖަޔަލަތު ކޮޑިއަރޗިގެ ޖަނަކަ ޕްރަސަންނަ ޕެރޭރާގެ މައްޗަށެވެ. އޭނާގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ.

އެގޮތުން 2019 ޖެނުއަރީ 10 ވަނަ ދުވަހުގެރޭ 21:30 ހާއިރު، ޕަތުމް ދިލްޝަންގެ ކައިރީގައި ބިސްގަނޑެއް އަޅައިދޭން އެދުުމުން ދެ މީހުންގެ ދެމެދުގައި އުފެދުނު ޒުވާބެއްގައި، ހައެއްކަ އިންޗީގެ ވަޅިއެއް ކައްކާގެ ކަރުން ތިރިއަށް މޭމައްޗަށް ހަރައިލި ކަމަށް ދައުވާގައިވެއެވެ.

މި މައްސަލައިގައި ކްރިމިނަލް ކޯޓުގައި މިއަދު ކުރިއަށްދިޔަ އަޑުއެހުމުގައި އޮތީ ޝަރީޢަތުގެކުރިން ހުށައަޅާ ހުށައެޅުންތަކާމެދު ގޮތެއް ނިންމުމެވެ. އެގޮތުން ދައުވާ ރައްދުވާ ފަރާތުން ތަހުޤީޤު މަރުޙަލާގައި ފުލުހުންނަށް ދީފައިވާ ބަޔާން މައްސަލައިގެ ހެކީގެ ގޮތުގައި ބަލައިގަތުމަށް ވަނީ ނިންމަވާފައެވެ. އަދި ދަޢުވާލިބޭ ޖަޔަލަތުގެ ފަރާތުން ހުށައަޅާފައިވާ ކަންކަމަކީ މި މަރުޙަލާގައި ޤާނޫނީ ގޮތުން ބަލައިގަނެވޭނެ ހުށައެޅުންތަކެއް ނޫންކަމަށްވެސް ނިންމެވިއެވެ.

މިއަދުގެ އަޑުއެހުމުގައި ޝަރީޢަތުން ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ކަނޑައަޅުއްވާފައެވެ.

މައްސަލަ ބައްލަވާ ޤާޟީ ދީބާނާޒް ފަހުމީ މިއަދު ވިދާޅުވީ، މި މައްސަލާގައި ހެކިބަސް ނެގުން އަންނަ ސެޕްޓެމްބަރު މަހުގެ ފަހުކޮޅު ނުވަތަ އޮކްޓޯބަރު މަހުގެ ކުރީކޮޅު ކުރިއަށް ގެންދަވާނެ ކަމަށެވެ.