ރާއްޖޭގައި މިހާރު ހިނގަމުންދާ ކަންކަމުން ދައްކުވައިދެނީ މިހާރު މިއީ އަޅުގަނޑުމެން ކުރިން އުޅުނު އަމާން ރާއްޖެ ނޫންކަން ކަމުގައި ކުރީގެ ރައީސް ޑރ. މުހައްމަދު ވަހީދު ހަސަން މަނިކު ވިދާޅުވެއްޖެއެވެ.

ޑރ. ވަހީދު މިހެން ވިދާޅުވީ މާލޭގައި ވަރަށް އަނިޔާވެރިގޮތަކަށް ޒުވާން އަންހެން ކުއްޖަކު ރޭ މަރާލި މައްސަލައާއި ގުޅިގެންނެވެ. މިއީ ރާއްޖޭގައި މިހާ އަނިޔާވެރިކޮށް ފަހުގެ ތާރީހެއްގައި ހިންގި މިފަދަ އެންމެ ބޮޑު ޖަރީމާއެވެ.

ޑރ. ވަހީދު ވިދާޅުވީ އެހާ އަނިޔާވެރިގޮތަކަށް މީހަކު މަރާލި ހަބަރު ލިބުމުން އެ މަނިކުފާނަށް ވަރަށް ބޮޑު ކަންބޮޑުވުމަކާއި އުނދަގޫތަކެއް ކުރިމަތިވެ ވަޑައިގެންނެވި ކަމަށެވެ. އަދި މިދަނޑިވަޅުގައި އެ މަރްހޫމާއާއި އާއިލާއަށް އެމަނިކުފާނު ވަނީ ހެޔޮ ދުއާ ކުރަށްވާފައެވެ.

ޑރ. ވަހީދު ވިދާޅުވީ ރާއްޖޭގައި މިހާރު ހިނގާ ކަންކަމަށް ބަލާއިރު މިއީ އަޅުގަނޑުމެން ދަންނަ ރާއްޖެއެއް ނޫންކަމަށެވެ. އަދި ކުރިން މީހަކު މަރާލުމަކީ އަޑު އިވޭ ވާހަކައަކަށް ނުވާއިރު މިހާހިސާބަށް މިގައުމުގައި ކަންކަން ދިޔައީ ކިހިނެއްތޯ ބަލަންޖެހޭކަމަށް ވެސް އެމަނިކުފާނު ވިދާޅުވެފައި ވެއެވެ.

"މިހާ އަނިޔާވެރިގޮތަކަށް މީހަކު މަރާލަން ދިމާވީ ކޮން ސަބަބުތަކެއް ދިމާވެގެންތޯ ހޯދާ ބަލަންޖެހޭ." ޑރ. ވަހީދު ވިދާޅުވިއެވެ.

ޑރ. ވަހީދު ވިދާޅުވީ އަނެއްކާވެސް އަމާންކަން މުޖްތަމައަށް ގެންނަން އިސްލާހުކުރަންޖެހޭ ކަންކަމާއި މެދު އިތުރަށް ނުވިސްނާ، އެކަންކަން ކުރަން ފަށަންޖެހޭކަމަށެވެ.