ހ. ޝީރީންވިލާގައި ރޭ ދަންވަރު އުމުރުން 23 އަހަރުގެ ޝިއާއު މުހައްމަދު ސައީދު (ޝިއާ) އަނިޔާވެރިގޮތަކަށް މަރައިލި މައްސަލައިގައި ހައްޔަރު ކުރި ފ. ނިލަންދޫ، ފިނިފެންމާގެ އަލީ ޝާހިލްގެ ބަންދުގެ އަޑުއެހުން ސިއްރު ކޮށްފިއެވެ.

ކްރިމިނަލް ކޯޓުން ބުނީ، ބަންދުގެ އަޑުއެހުން ސިއްރު ކުރަން ޤާޟީ ނިންމެވީ ފުލުހުންގެ އެދުމުގެ މަތިން ކަމަށެވެ.

މިމައްސަލައާ ގުޅިގެން މިހާތަނަށް ފުލުހުން އެއްވެސް ތަފްސީލެއް ހާމަކޮށްފައެއްނުވެއެވެ. މައުލޫމާތު ލިބިފައިވާ ގޮތުގައި ޝިއާއުގެ ހަށިގަނޑަށް ވަނީ ލާއިންސާނީ އަނިޔާތަކެއްދީފައެވެ.

މި މައްސަލަ އާއި ގުޅިގެން ޝާހިލް ހައްޔަރު ކުރީ ކުށުގެ ވެށިން ކަމަށް މަޢުލޫމާތު ލިބިފައިވެއެވެ. އޭނާ އަކީ މަޝްހޫރު ސްކޭޓަރ އެކެވެ.

ޝިއާއުގެ މަރުގެ ހާދިސާ ހިނގިކަން ފުލުހުންނަށް ރިޕޯޓު ކުރީ ރޭ 10:30 ހާއިރުއެވެ. ޝާހިލްގެ ހަށިގަނޑާއި ލައިގެން ހުރި އަންނައުނުގައި ލޭ ހުރުމުން އޭނާ ހައްޔަރުކޮށްގެން ފުލުހުންގެ ކާރެއްގައި ގެންދިޔައީ ހަޒްމަޓް ސޫޓެއް ލައްވައިގެނެވެ.