ހ. ޝީރީންވިލާގައި ރޭ ދަންވަރު އުމުރުން 23 އަހަރުގެ ޝިއާއު މުހައްމަދު ސައީދު (ޝިއާ) އަނިޔާވެރިގޮތަކަށް ޤަތުލުކޮށްލުމާގުޅިގެން އޭނާގެ ޢާއިލާއަށް ހިމޭންކަމާއެކު ވަގުތު ހޭދަކުރުމަށް ފުރުސަތު ދިނުމަށް ޖެންޑަރ މިނިސްޓްރީން އެދިއްޖެއެވެ.

ޖެންޑާ މިނިސްޓްރީން މިއަދު ބުނެފައިވަނީ ރޭގެ ވަގުތެއްގައި މާލޭގެ ގެއެއްގައި ރަހުމުކުޑަކޮށް އަންހެނަކު މަރައިލި ލާއިންސާނީ އަމަލު ހަރުކަށި އިބާރާތުން ކުށްވެރިކުރާ ކަމަށެވެ. އަދި ގެވެށި އަނިޔާގެ މިފަދަ އެއްވެސް މައްސަލައަކީ ބަލައިގަނެވޭނެ މައްސަލައެއް ނޫންކަމަށް އެ މިނިސްޓްރީން ބުނެފައިވެއެވެ.

މިނިސްޓްރީން ބުނީ ކޮންމެ މީހަކަށްވެސް ދިރިހުރުމުގެ ޙައްޤު ލިބިފައިވާ ކަމަށެވެ. އަދި ކޮންމެ ނަފުސަކަށްވެސް ރައްކާތެރިކަން ލިބެންޖެހޭ ކަމަށް މިނިސްޓްރީން ވަނީ ބުނެފައެވެ.

"ޢާއިލާއަށް ކެތްތެރިކަން ދެއްވާށި. މި ހިތާމަވެރި، އުނދަގޫ ދަނޑިވަޅުގައި އެކަން ތަހައްމަލުކޮށް ހިމޭން ކަމާއެކު ވަޤުތު ހޭދަކުރުމަށް ޢާއިލާއަށް ފުރުޞަތު ދިނުމަކީ ކޮންމެ ފަރާތަކުންވެސް މިވަޤުތު ކުރުން މުހިންމު ކަމެއް ކަމުގައި ދެކެން." މިނިސްޓްރީން ބުނެފައިވެއެވެ.

ޝިއާއުގެ އާއިލާއިން އެދިފައިވަނީ އޭނާގެ ފޮޓޯ މީޑިއާގައި އާންމުކޮށް ދައުރުނުކުރުމަށެވެ. އަދި ހަށިގަނޑަށް ލިބިފައިވާ އަނިޔާތަކުގެ ތަފްސީލުތައް ގެނެސްނުދިނުމަށްވެސް އެދިފައިވެއެވެ.

ޝިއާއުގެ މަރުގެ ހާދިސާ ހިނގިކަން ފުލުހުންނަށް ރިޕޯޓު ކުރީ ރޭ 10:30 ހާއިރުއެވެ. އެ މައްސަލައިގެ ތުހުމަތުގައި ހައްޔަރުކުރި ޝާހިލްގެ ހަށިގަނޑާއި ލައިގެން ހުރި އަންނައުނުގައި ލޭ ހުރުމުން އޭނާ ހައްޔަރުކޮށްގެން ފުލުހުންގެ ކާރެއްގައި ގެންދިޔައީ ހަޒްމަޓް ސޫޓެއް ލައްވައިގެނެވެ.