އަނިޔާވެރިގޮތަކަށް ޝިއާއު މަރައިލި މައްސަލައިގައި ހައްޔަރު ކުރި ފ. ނިލަންދޫ، ފިނިފެންމާގެ އަލީ ޝާހިލް ޝަރީޢަަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.

ޝާހިލްގެ ބަންދުގެ އަޑުއެހުން ކްރިމިނަލް ކޯޓުގައި ކުރިއަށް ގެންދިޔައީ ސިއްރު އަޑުއެހުމެއްގެ ގޮތުގައެވެ. ކްރިމިނަލް ކޯޓުން އަމުރުކޮށްފައިވަނީ އަލީ ޝާހިލް ޝަރީޢަަތް ނިމެންދެން ބަންދުކުރުމަށެވެ.

ހ. ޝީރީންވިލާގައި ރޭ ދަންވަރު އުމުރުން 23 އަހަރުގެ ޝިއާއު މުހައްމަދު ސައީދު (ޝިއާ) ޤަތުލުކޮށްލުމާ ގުޅިގެން މިހާތަނަށް ފުލުހުން އެއްވެސް ތަފްސީލެއް ހާމަކޮށްފައެއްނުވެއެވެ. މައުލޫމާތު ލިބިފައިވާ ގޮތުގައި ޝިއާއުގެ ހަށިގަނޑަށް ލާއިންސާނީ އަނިޔާތަކެއް ވަނީ ދީފައެވެ.

މި މައްސަލަ އާއި ގުޅިގެން ޝާހިލް ހައްޔަރު ކުރީ ކުށުގެ ވެށިން ކަމަށް މަޢުލޫމާތު ލިބިފައިވެއެވެ. އޭނާ އަކީ މަޝްހޫރު ސްކޭޓަރ އެކެވެ.

ޝިއާއުގެ މަރުގެ ހާދިސާ ހިނގިކަން ފުލުހުންނަށް ރިޕޯޓު ކުރީ ރޭ 10:30 ހާއިރުއެވެ. ޝާހިލްގެ ހަށިގަނޑާއި ލައިގެން ހުރި އަންނައުނުގައި ލޭ ހުރުމުން އޭނާ ހައްޔަރުކޮށްގެން ފުލުހުންގެ ކާރެއްގައި ގެންދިޔައީ ހަޒްމަޓް ސޫޓެއް ލައްވައިގެނެވެ.