ބޮޑެތި އަނިޔާތަކަކާއެކު ރޭ މާލޭގައި މަރާލާފައިވާ އަންހެން މީހާގެ ގާތިލުކަމަށް ތުހުމަތުކުރާ ފ. ނިލަންދޫ، ފިނިފެންމާގެ އަލީ ޝާހިލް (ޝާހިލް) ހައްޔަރުކޮށް ޓެސްޓް ކުރިއިރު މަސްތުވާތަކެއްޗަށް ޕޮޒިޓިވް ވެފައިވާކަމަށް ފުލުހުން ބުނެފިއެވެ.

ރޭ މަރާލާފައިވާ ޏ. ފުވައްމުލަކަށް ނިސްބަތްވާ ޝިއާއު މުހައްމަދު ސައީދު (ޝިއާ) ގެ މަރާއި ގުޅޭގޮތުން މައުލޫމާތު ދިނުމަށް ދެންމެ ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނީ، ޝިއާ މަރާލިކަމަށް ތުހުމަތު ކުރާ ޝާހިލް ކުށުގެ ވެށިން ހައްޔަރުކޮށްގެން ގެންގޮސް މަސްތުވާތަކެއްޗަށް ޓެސްޓް ކުރިއިރު މަސްތުވާތަކެއްޗަށް ޕޮޒިޓިވް ވެފައިވާކަމަށެވެ.

ނަމަވެސް، ފުލުހުން ބުނެފައިވަނީ އޭނާ މަސްތުވާތަކެއްޗަށް ޕޮޒިޓިވްކަން އެނގިފައިވަނީ އެކަމަށްޓަކައި ހެދި ޓެސްޓްގެ ވަގުތީ ނަތީޖާއަކުން ކަމަށެވެ. ގާތިލުކަމަށް ތުހުމަތުކުރާ ޝާހިލްއާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެމުން ފުލުހުންބުނީ، ޝާހިލްއަކީ ފުލުހުންގެ އިދާރާގައި ކުށުގެ ރެކޯޑެއް އޮތް ފަރާތެއް ނޫންކަމަށެވެ. ނަމަވެސް، އޭނާއަކީ ގެވެށި އަނިޔާފަދަ މައްސަލަތަކުގައި ޝާމިލްވާ ފަރާތެއްކަމަށް މި މައްސަލައިގެ ތަހުގީގަށް މައުލޫމާތު ލިބިފައިވާ ކަމަށް ފުލުހުން ބުނެފައިވެއެވެ.

ރޭ ދަންވަރުގެ ވަގުތެއްގައި ހ. ޝީރީނުވިލާގޭގެ އެޕާޓްމަންޓެއްގައި މަރާލާފައިވާ ޝިއާގެ ހަށިގަނޑަށް ލާއިންސާނީ އަނިޔާތަކެއް ދީފައިވާކަމަށް ފުލުހުންވަނީ ބުނެފައެވެ. ފުލުހުން މިހާރުވަނީ ޝިއާގެ ޕޯސްޓްމޯޓަމްއެއް ހަދަން ނިންމާފައެވެ.