ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރަކީ، އިންސާނީ ތަރައްގީއާއި ކޮންކްރީޓް ތަރައްގީ އެކުއެކުގައި ގެނެސްދެމުންދާ ސަރުކާރެއް ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

ދައުލަތުގެ މީޑިޔާގައި މިރޭ ވާހަކަ ދައްކަވަމުން، އާޒިމް ވިދާޅުވީ ކޮންކްރީޓް ތަރައްގީއަކީ ތަރައްގީއެއް ނޫންކަމަށް ބައެއް ބޭފުޅުން ވިދާޅުވާ ކަމަށާ، ނަމަވެސް، ކޮންކްރީޓް ތަރައްގީވެސް އެއީ ތަރައްގީއެއް ކަމަށެވެ. ނަމަވެސް ތަރައްގީ ފުރިހަމަވަނީ ކޮންކްރީޓް ތަރައްގީއާއިއެކު އިންސާނީ ތަރައްގީ ވެސް އައުމުން ކަމަށް އާޒިމް ވިދާޅުވިއެވެ.

އާޒިމް ވިދާޅުވީ، މީގެ ކުރީގައި ސަރުކާރަކުން އެ ދެބާވަތުގެ ތަރައްގީ އެއްކޮށް ކުރިއަށް ގެންދިޔަ އަޑެއް އައްސަވާފައި ނުވާކަމަށެވެ. އެގޮތުން، މި ސަރުކާރުގައި ކޮންކްރީޓް ތަރައްގީ ވެސް ނުހިނގާ އެންމެ ރަށެއްވެސް ނޯންނާނެ ކަމަށާ، ހަމަ އެއާއިއެކު އެ ކަންކަން ބަލަހައްޓާނެ ކިޔަވައިގެންތިބި ވަރުގަދަ ޖީލެއް ވެސް އަންނަން ޖެހޭކަމަށް އާޒިމް ވިދާޅުވިއެވެ.

އާޒިމްގެ ވާހަކައިގައި، އެފަދަ ޖީލެއް ބިނާ ކުރުމަށް ރައީސް ޞާލިޙްގެ ސަރުކާރުން އިސްކަން ދެއްވައިގެން ކުރިއަށް ގެންދަވާ ހިލޭ ޑިގްރީ ޕްރޮގްރާމް ފާހަގަ ކުރެއްވިއެވެ.

"އެހެންވީމަ މިހާ ފުރިހަމަކޮށް ގައުމެއް ކުރިއަށް ގެންދެވޭ ސަރުކާރެއް މިހާތަނަކަށް ނާދޭ. އެހެންވީމަ އަޅުގަނޑުމެން އަބަދުވެސް ޝުކުރުވެރިވާންޖެހޭ މިކަހަލަ ރައީސުލްޖުމްހޫރިއްޔާއެއް އަޅުގަނޑުމެންނަށް ލިބުނީމަ. އަބަދަކު ލިބޭނެކަހަލަ ބޭފުޅެއް ނޫން މިއީކީއެއް." އާޒިމް ވިދާޅުވިއެވެ.

މިރޭގެ ޕްރޮގްރާމްގައި އާޒިމްވަނީ، މި ސަރުކާރުން އެމްޓީސީސީއާއި ހަވާލު ކޮށްގެން ކުރިއަށް ގެންދާ މަޝްރޫއުތަކާއި ގުޅޭގޮތުން ތަފްސީލުކޮށް ވާހަކަ ދައްކަވާފައެވެ.