ހދ. ކުޅުދުއްފުށީ ރީޖަނަލް ހޮސްޕިޓަލް މަރާމާތުކުރުމުގެ މަޝްރޫއުގެ ދަށުން އައި.ސީ.ޔޫ. ޢިމާރާތް ކުރުމުގެ މަޝްރޫޢުގެ މަސައްކަތް ނިމިފައިވާކަމަށް މަސައްކަތުގެ ކޮންޓްރެކްޓަރ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީން ހާމަކޮށްފިއެވެ.

އަތޮޅުތެރޭގެ ސިއްޙީ ޚިދުމަތް މުޅިން އައު ހަރުފަތަކަށް ގެންގޮސް ދެއްވުމަކީ ރައީސް ޞާލިޙްގެ ރިޔާސީ ވަޢުދެކެވެ. އެގޮތުން ހދ. ކުޅުދުއްފުށީ ރީޖަނަލް ހޮސްޕިޓަލުގެ އަޕްގްރޭޑިންގ މަސައްކަތްތައް ސަރުކާރުން ހަވާލުކޮށްފައިވަނީ އެމްޓީސީސީއާއެވެ.

އެމްޓީސީސީން މިއަދު ބުނީ ކުޅުދުއްފުށި ހޮސްޕިޓަލް މަރާމާތު ކުރުމުގެ މަޝްރޫޢުގައި ހިމެނޭ އައި.ސީ.ޔޫ. ޢިމާރާތް ކުރުމުގެ މަޝްރޫޢުގެ މަސައްކަތް ނިމިފައިވާކަމަށެވެ. އެގޮތުން ހޮސްޕިޓަލްގެ 2 ވަނަ ފަންގިފިލާގައި 6 އައި.ސީ.ޔޫ ކޮޓަރީގެ 30 އެނދަށް މެޑިކަލް ގޭސް ލިބެން ހުންނާނެ ކަމަށް އެމްޓީސީސީން ހާމަކޮށްފައިވެއެވެ.

މި މަޝްރޫޢުގެ ދަށުން، އޯޕީޑީ އިމާރާތުގެ މަޝްރޫޢުގެ މަސައްކަތުގެ 64 ޕަސެންޓް ނިމިފައިވާ ކަމަށާއި ޕޮއިންޓް ވަޔަރިންގ، ފިޓިންގްސް، މޭސަނަރީ އާއި ޕްލާސްޓަރިންގ މަސައްކަތްތައްވެސް ވަނީ ނިމިފައިކަމަށްވެސް އެމްޓީސީސީން މަޢުލޫމާތުދީފައިވެއެވެ. މި މަޝްރޫޢުގެ ދަށުން، އޯޕީޑީ އިމާރާތަކާއި، ވޯރޑް އިމާރާތަކާއި، އައި.ސީ.ޔޫ ޔުނިޓަކާއި ލެބޯރެޓަރީ އިމާރާތެއް އެޅުމަށް ވަނީ ހަމަޖެހިފައެވެ.

ހޮސްޕިޓަލްގެ އޯ.ޕީ.ޑީ އިމާރާތް ހަދައި ނިމޭއިރު، ބަލި މީހުން ބެލުމަށް ޚާއްޞަ 21 ރޫމަކާއި، ޓްރީޓްމެންޓް ރޫމަކާއި، ޕްރޮސީޖަރ ރޫމަކާއި، އީސީޖީ ރޫމެއްގެ އިތުރުން އެކޯ ރޫމެއް ހިމެނޭނެ އެވެ.

މި މަޝްރޫޢަކީ ދައުލަތުން 30.3 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.

ރާއްޖޭގެ އުތުރުގެ ރައްޔިތުން ސިއްޙީ ޚިދުމަތް ހޯދުމަށް އެންމެ ބޮޑަށް ބަރޯސާ ވެފައިވާ ކުޅުދުއްފުށީ ރީޖަނަލް ހޮސްޕިޓަލަށް އަންނަމުންދާ ކުރިއެރުންތަކަކީ އުތުރުގެ އަތޮޅުތަކުގެ ރައްޔިތުންގެ ހިތްތަކަށް ހިތްހަމަޖެހުމުގެ ތަސައްލީއެއް ގެނެސްދޭނެ ކުރިއެރުންތަކެއްކަން ސަރުކާރުން ވަނީ ފާހަގޮށްފައެވެ.