އަނިޔާވެރިކަމާއެކު ހަށިގަނޑުގެ 8 ތަނަކަށް ތޫނު އެއްޗަކުން ހަމަލާދީ މަރާލާފައިވާ ގއ. ދާންދޫ، ގޯލްޑް ލީފް، ހާރިސް ޢަބްދުލްޣަފޫރުގެ މަރުގެ މައްސައިގައި ދަޢުލަތުން ދަޢުވާކުރި މީހާގެ މައްޗަށް ކުށް ސާބިތުނުވުމުން އެމައްސަލަ ހައިކޯޓުގައި އިސްތިޢުނާފް ކޮށްފިއެވެ.

ޕީޖީ އޮފީހުން ބުނީ ހާރިސްގެ މަރުގެ މައްސަލައިގެ ދަޢުވާ ސާބިތުވެފައި ނުވާތީ 12 ފެބްރުވަރީ 2023 ދުވަހު އެމައްސަލަ ދިވެހިރާއްޖޭގެ ހައިކޯޓުގައި އިސްތިއުނާފު ކޮށްފައިވާ ކަމަށެވެ.

ހުޅުމާލޭ ހާފްވޭ ހައުސްގައި މަސްތުވާތަކެތީގެ ވަބާއަށް ފަރުވާ ހޯދަމުންދިޔަ ހާރިސްއަށް ވަޅިން ހަމަލާ ދިފައިވަނީ، 2017 ސެޕްޓެމްބަރު މަހުގެ 29 ވަނަ ދުވަހުގެ ރޭ އާއިލީ ދުވަހަށް ބޭރަށް ދިއުމަށްފަހު އެނބުރި ހާފްވޭ ހައުސްއަށް ދަނިކޮށް، ހާފްވޭ ހައުސް ކައިރިން، ސައިކަލެއްގައި ދިޔަ ދެމީހެކެވެ.

ހާރިސް މަރާލިކަމުގެ ތުހުމަތުގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ އުފުލާފައިވަނީ ޏ. ފުވައްމުލައް، ހިލްޓަން ޔާމިން ރަޝީދުގެ މައްޗަށެވެ. ނަމަވެސް މި މައްސަލައިގެ އަޑުއެހުންތަކަށް އެޙާދިސާގެ މަންޒަރު ދުށްކަމަށް ދަޢުލަތުން ބުނާ ސިއްރު ހެކިވެރިން ޙާޟިރުކުރެވިފައެއް ނުވެއެވެ. އެހެންކަމުން އޭނާއާ ދެކޮޅަށް އެކަށީގެންވާ ހެއްކެއް ލިބޭގޮތް ވަނީ ނުވެފައެވެ.

ހާރިސް މަރާލުމުގެ ދައުވާ ޔާމިން ރަޝީދުގެ މައްޗަށް ސާބިތުނުވާކަމަށް ކްރިމިނަލް ކޯޓުން ޙުކުމް ކޮށްފައިވަނީ 29 ޑިސެންބަރު 2022 ވަނަ ދުވަހުއެވެ.