ޒަޚަމްތަކަކާއެކު ނ. މަނަދޫގައި މަރާލާފައި އޮއްވާ ފެނުނު އުމުރުން 62 އަހަރުގެ ނައީމާ މޫސާގެ މަރުގެ މައްސަލައިގެ ތަޙުޤީޤަށް އެރަށު ބައެއްމީސްމީހުންގެ ހަށިގަނޑުން ސާމްޕަލް ނަގައިފިއެވެ.

ނައީމާ މަރާލަަފަައި އޮއްވާ ފެނިފައިވަނީ މި އޭޕްރީލްމަހުގެ 07 ވަނަ ދުވަހު އިރުއޮއްސުނު ވަގުތު އޭނާގެ ޚަބަރެއް ނުވެގެން އޭނާ ދިރިއުޅެމުންދިޔަ ގޭގެ ދޮރު ހަލާކުކޮށްލުމަށް ފަހު ފުލުހުން ވަދެ ބެލުމުންނެވެ. ނައީމާ ފެނުނީ އޭނާ ދިރިއުޅޭ ކޮޓަރީގެ ތަޅުންގަނޑު މަތީގައި އަނިޔާ ތަކަކާއެކު މަރުވެފައި އޮއްވައެވެ. އެމައްސަލަ ފުލުހުން ތަހުގީގު ކުރަމުންދާއިރު މިހާތަނަށް އެ މައްސަލައިގައި މީހަކު ހައްޔަރު ކޮށްފައެއް ނުވެއެވެެ.

އެމައްސަލައިގެ ތަޙުޤީޤަށް ފުލުހުންގެ ފޮރެންސިކް ޓީމެއް މަނަދޫގައި ޙަރަކާތްތެރިވަމުން ގެންދާއިރު އެޓީމުން މިހާރުވަނީ އެރަށުގައި ދިރިއުޅޭ ބައެއް މީހުންގެ ޑީއެންއޭ ސާމްޕަލާއި އިނގިލީގެ ނިޝާން ނަގާފަ އެވެ.

ނައީމާގެ މަރާ ގުޅިގެން ހިންގާ ތަހުގީގުގައި ފުލުހުން ވަނީ ނައީމާ ދިރިއުޅުނު ގެ ހިމެނޭ ސަރަހައްދު ބަންދުކޮށް ބަލައިފާސްކޮށްފަ އެވެ. އޭގެއިތުރުން މަނަދޫގެ ބައެއް އެހެން ސަރަހައްދުތައްވެސް ބަލައިފާސްކޮށްފައިވެ އެވެ.

ނައީމާގެ މަރާ ގުޅޭގޮތުން ފުލުހުން ނެރުނު ނޫސް ބަޔާނުގައި ބުނެފައިވަނީ އޭނާގެ މަރުގައި ތުހުމަތު ކުރެވޭ ކަންތައްތަކެއް ފާހަގަކުރެވިފައިވާ ކަމަށާއި، މައްސަލައިގެ ތަހުގީގު ކުރިއަށް ގެންދަނީ ހޮމަސައިޑް އިންވެސްޓިގޭޝަނެއްގެ ގޮތުގައި ކަމަށެވެ.

ނައީމާ ގެ ހަށިގަނޑު ބަލައި، ތަހުލީލުތަކަށް ބޭނުންވާ ސާމްޕަލް ނެގުމަށް ފަހު އޭޕްރީލް 08 ވަނަ ދުވަހު ހަވީރު އޭނާ ވަނީ ވަޅުލާފައެވެ. އެހެން މަރުތަކާއި ހިލާފަށް ނައީމާ ވަޅުލާފައިވަނީ ޕޯސްޓްމޯޓަމް ހެދުމެއް ނެތިއެވެ. ފުލުހުން ބުނީ ހަށިގަނޑު ވަޅުލާފައިވަނީ އިތުރަށް ޕޯސްޓްމޯޓަމް ހަދަން ޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމާފައިވާތީ ކަމަށެވެ.