ރ. ކިނޮޅަސް ގޮނޑުދޮށް ހިމާޔަތްކުރުމުގެ މަޝްރޫއު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ ޕަބްލިކް ލިމިޓެޑް (އެމްޓީސީސީ)އާ ހަވާލުކޮށްފިއެވެ.

މި މަޝްރޫޢުގެ މަސައްކަތް ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމް އެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ.

678 މީހުންގެ އާބާދީއެއް ދިރިއުޅޭ ރ. ކިނޮޅަހު ރައްޔިތުންގެ އެންމެބޮޑު އެއް ކަންބޮޑުވުމަކީ އެރަށް ދިމާވެފައިވާ ރަށްގިރުމުގެ މައްސަލަކަމަށް އެމްޓީސީސީން ވަނީ ބުނެފައެވެ. އެގޮތުން ވޭތުވެދިޔަ 7 އަހަރުގެތެރޭގައި އެރަށުގެ އިރުމަތީ ފަރާތުގެ ގޮނޑުދޮށުން 200 ފޫޓެއްހާ ސަރަހައްދެއް ގިރާފައިވާއިރު، ހުޅަނގު ފަރާތު ގޮނޑުދޮށުން 400 ފޫޓުގެ ސަރަޙައްދެއް ވަނީ ގިރާފައެވެ.

އެހެންކަމުން މިއަދު ސޮއިކުރެވިގެން މިދިޔަ ގޮނޑުދޮށް ހިމާޔަތް ކުރުމުގެ މަޝްރޫޢުގެ ސަބަބުން، މުސްތަޤުބަލުގައި ކިނޮޅަހު ރައްޔިތުންނަށް ދިމާވެފައިވާ ރަށްގިރުމުގެ މައްސަލައަށް ބޮޑު ހައްލެއް ލިބިގެންދާނެ ކަމަށް އެމްޓީސީސީން ވަނީ ބުނެފައެވެ.

ކިނޮޅަހު ގޮނޑުދޮށް ޙިމާޔަތްކުރުމުގެ މަޝްރޫއުގެ ދަށުން 19،780 ކޮޑިމީޓަރުގެ ބިން ހިއްކުމާއި، 650 މީޓަރުގެ ޖިއޯބޭގް ރިވެޓްމެންޓް ޖެހުމުގެ މަސައްކަތް ހިމެނެއެވެ.

ކިނޮޅަސް ގޮނޑުދޮށް ހިމާޔަތް ކުރުމުގެ މަސައްކަތް އެމްޓީސީސީއަށް ހަވާލު ކޮށްފައިވަނީ 180 ދުވަހުގެ ތެރޭގައި ނިންމާގޮތަށް 11.45 މިލިއަން ރުފިޔާއަށެވެ.