މި އަހަރު ރާއްޖެއިން ޙައްޖަށް މީހުން ގެންދިއުމުގެ ހުއްދަ ތިން ކުންފުންޏަކަށް ދީފައިވާކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން ބުނީ، މިއަހަރު މީހުން ޙައްޖަށް ގެންދިއުމުގެ ހުއްދަދީފައިވާ ތިން ކުންފުންޏަކީ އަލްޙަރަމައިން ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑާއި، ސިސިލްފަރު ހައްޖު އެންޑް އުމްރާ ޕްރައިވެޓް ލިމިޓެޑްގެ އިތުރުން އަލްމަނާސިކް ޕްރައިވެޓް ލިމިޓެޑަށް ކަމަށެވެ. މި ތިން ކުންފުންޏަށްވެސް ދީފައިވަނީ 90 ކޯޓާއެވެ.

އެގޮތުން އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،250 ރުފިޔާއެވެ. އަދި ސިސިލްފަރު ޙައްޖު އެންޑް ޢުމްރާ ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،465 ރުފިޔާއެވެ. އޭގެއިތުރުން އަލްމަނާސިކް ޕްރައިވެޓް ލިމިޓެޑުން މީހުން ގެންދިއުމަށް ކަނޑައަޅާފައިވާ އަގަކީ 75،000 ރުފިޔާއެވެ.

އިސްލާމިކް މިނިސްޓްރީން ބުނީ، ހުއްދަ ދީފައިވާ އަގަށްވުރެ އިތުރަށް މީހުންގެ އަތުން ފައިސާ ނެގުމާއި، ކުންފުނިތަކަށް ފައިސާ ދެއްކުމާއި، ހުއްދަ ދީފައިވާ ކޯޓާއަށްވުރެ އިތުރަށް މީހުން ހައްޖަށް ގެންދިޔުމަށް އެއްވެސް ފަރާތަކުން ފައިސާ ނެގުމަކީ ދިވެހިރާއްޖެއިން ހައްޖަށް މީހުން ގެންދިއުމާބެހޭ އުސޫލުގެ ދަށުން މަނާކަމެއްކަމަށެވެ.

ރާއްޖެއަށް މިއަހަރު ލިބިފައިވަނީ 1،000 މީހުންގެ ހައްޖު ކޯޓާއެވެ. އަދި ސަރުކާރުން ގެންދަނީ މިއަދަދު 2500 އަށް އިތުރުކުރެވޭތޯ މަސައްކަތް ކުރަމުންނެވެ.

އަމިއްލަ ކުންފުނިތަކަށް 270 ހައްޖު ކޯޓާ ދިނުމަށްފަހު ބާކީ 730 ކޯޓާ މިއަހަރު ޚާއްސަކޮށްފައިވަނީ ހައްޖު ކޯޕަރޭޝަނަށެވެ.