ރާއްޖޭގެ ޚާރިޖީ ވުޒާރާއަށް ސާޅީސް އަހަރަށްވުރެ ދިގު މުއްދަތަކަށް ޚިދުމަތް ކުރެއްވި އާބިދާ އަހްމަދު ނިޔާވެއްޖެއެވެ.

އާބިދާ ނިޔާވީ ރޭ ދަންވަރުގެ ވަގުތެއްގައެވެ. ނިޔާވިއިރު އުމުރުފުޅަކީ 66 އަހަރެވެ. އާބިދާގެ ކަށުނަމާދު މިއަދު ޢަސްރު ނަމާދަށްފަހު އާސަހަރާ މިސްކިތުގައި އޮންނާނެއެވެ.

އާބިދާ ނިޔާވުމާއި ގުޅިގެން ޚާރިޖީ ވަޒީރު އަބްދުﷲ ޝާހިދު ވިދާޅުވީ، މިއަދު އެމިނިސްޓްރީއާ ވަކިވެގެން ދިޔަ އާބިދާ އަހްމަދަކީ ދިވެހި ޚާރިޖީ ޓީމުގެ އެއް ތަނބު ކަމަށެވެ. އެގޮތުން ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު އެމިނިސްޓްރީއަށް އާބިދާ ހިދުމަތްކުރައްވާފައިވާ ކަމަށް މިނިސްޓަރު ވިދާޅުވިއެވެ.

"އާބިގެ ހަނދާން މި މިނިސްޓްރީގެ މުވައްޒަފުންގެ ހިތްތަކުން ދުވަހަކުވެސް ފިލައިގެންނުދާނެ. އާބި ނެތްކަމުގެ އިހުސާސް އަބަދުވެސް ވާނެ." މިނިސްޓަރ ޝާހިދު ވިދާޅުވެފައިވެއެވެ.

މިއަދު އަޅުގަނޑުމެންނާ ވަކިވެގެން ދިޔަ އާބިދާ އަހްމަދަކީ ޚާރިޖީ ޓީމުގެ އެއް ތަނބު!

ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު މިނިސްޓްރީއަށް ޚިދުމަތްކުރައްވާފައިވޭ. އާބިއަކީ އެންމެންގެ އެކުވެރިއެއް.

އާބިގެ ހަނދާން މި މިނިސްޓްރީގެ މުވައްޒަފުންގެ…

— Abdulla Shahid (@abdulla_shahid) May 8, 2023

އާބިދާ ސަރުކާރަށް ހިދުމަތް ކުރައްވަން ފެއްޓެވީ، މުލީއާގޭ މެއިޑެއްގެ ވަޒީފާއިން 15 ނޮވެންބަރު 1978 ގައެވެ. މެއިޑެއްގެ ވަޒީފާއިން 8 ޖޫން 1982 ގައި ވަކިވެވަޑައިގަތުމަށްފަހު، އަލުން ހިދުމަތް ފެއްޓެވީ 26 ސެޕްޓެންބަރު 1983 ގައި މޯލްޑިވްސް އެއާޕޯޓްސް އޮތޯރިޓީގެ ޓެލެފޯން އޮޕަރޭޓަރެއްގެ ވަޒީފާއިންނެވެ.

އޭގެފަހުން 15 އޮގަސްޓު 1985 އިން ފެށިގެން ހިދުމަތް ކުރައްވަމުން ގެންގޮސްފައި ވަނީ، ފޮރިން މިނިސްޓްރީގައެވެ. މި ވޭތުވެދިޔަ ދިގު މުއްދަތުގެ ތެރޭގައި، އާބިދާވަނީ އެ މިނިސްޓްރީއަށް އަގުހުރި ހިދުމަތްތަކެއް ކޮށްދެއްވައިފައެވެ.