ޗައިނާގެ އަސްކަރިއްޔާއަށް ހަޖޫޖަހައި މަޖާޒީ ބަސްބުނެގެން ހައްޔަރުކުރި ކޮމޭޑިއަން އަކާއި އެއްބައިވި އަންހެނަކު ހައްޔަރުކޮށްފިއެވެ.

ދައުލަތުގެ މީޑިއާ ރިޕޯޓްތައް ބުނާ ގޮތުގައި ޝީ ނަމަކަށް ކިޔާ އުމުރުން 34 އަހަރުގެ އެ އަންހެން މީހާ ހައްޔަރުކޮށްފައިވަނީ، ޗައިނާ ސިފައިންނާ ބެހޭ ގޮތުން އެކަށީގެން ނުވާ ބޭއަދަބީ ބަސް މީސްމީޑިއާގައި ބޭނުނުކުރުމުންނެވެ. އަދި އެކަމަށް އެއަންހެންމީހާ ވަނީ އެއްބަސްވެފައެވެ.

ޝީގެ އޮންލައިން ޕޯސްޓަކީ ޗައިނާގެ ރައީސް، ޝީ ޖިންޕިންގެ އަސްކަރީ ޝިއާރު ސިފަވާހެން ފުރައްސާރަކުރި ކޮމޭޑިއަންއަށް ދިން އަދަބަށް ރައްދުދީ ލިޔުނު ޕޯސްޓެއްކަމަށްވެއެވެ. ކޮމޭޑިއަން ކުރި ފުރައްސާރައިގެ އޯޑިއޯ ރެކޯޑިން ވައިރަލްވުމާއެކު ބެއިޖިން ފުލުހުން ވަނީ ޗައިނާގެ އަސްކަރިއްޔާ، ޕީޕަލްސް ލިބަރޭޝަން އާމީއަށް ފުރައްސާރަ ކުރުމަކީ ކުށެއް ކަމަށް ކަނޑައަޅާފައިވާ ގާނޫނެއްގެ ދަށުން ތަހުގީގެއް ފަށާފައެވެ.

ކޮމޭޑިއަން ކުރި ފުރައްސާރައާއި ގުޅިގެން އޭނާ ހައްޔަރުކުރުމުގެ އިތުރަށް، އޭނާ މަސައްކަތްކުރަމުން އައި ކުންފުނި ވަނީ 1.68 މިލިއަން ޕައުންޑުން ޖޫރިމަނާކޮށްފަ އެވެ. ފަހުން އޭނާ ވަނީ މީސްމީޑިއާ މެދުވެރިކޮށް އޭނާކުރީ ސަމާސާއެއްކަމަށާއި، ނަމަވެސް ކުރެވުނީ ކުށެއްކަމަށްބުނެ މަޢާފަށް އެދިފައެވެ.

ކޮމޭޑިއަން ދިފާއުކޮށް ހިތްވަރުދެމުން ޝީ ކުރި ޕޯސްޓުގައި ކޮމޭޑިއަންއަށް ދިން އަދަބާ ގުޅޭގޮތުން ސުވާލު އުފައްދައިފައި ވެއެވެ. މިކަމާއި ގުޅިގެން އެއަންހެން މީހާ ހައްޔަރުކޮށް އޭނާގެ ބަންދަށް ވަނީ 15 ދުވަސް ޖަހާފައެވެ.