ޒަކާތު ފަންޑުން މި އަހަރު ބޭސް ފަރުވާއަށް 6 މިލިއަނަށްވުރެ ގިނަ ރުފިޔާ ހޭދަކޮށްފައިވާ ކަމަށް އިސްލާމިކް މިނިސްޓްރީން ހާމަކޮށްފިއެވެ.

ޒަކާތު ފަންޑުން ބޭސްފަރުވާގެ އެހީއަށް އެދި ހުށައަޅާ ފަރާތްތަކަށް ހަރަދުކުރަނީ ޒަކާތުގެ ބެހެނިވެރިންގެ ތެރޭގައި ހިމެނޭ ފަގީރުންނާއި މިސްކީނުންގެ ބައިންނެވެ. އެގޮތުން ދުވާލެއްގެ މައްޗަށް 40 އަށް ވުރެ ގިނަ ފޯމު ބޭސްފަރުވާގެ އެހީއަށް އެދި ހުށަހަޅާ ކަމަށް އިސްލާމިކް މިނިސްޓްރީން ވަނީ ހާމަކޮށްފައެވެ.

ރާއްޖޭގެ މީޑިއާއެއްގައި ވާހަކަ ދައްކަވަމުން އިސްލާމިކް މިނިސްޓްރީގެ ފަންޑް މެނޭޖަރ އަބްދުﷲ އަލީ ވިދާޅުވީ ބޭސް ފަރުވާއަށް އެހީ ދިނުމުގެ ކަންކަން ބަލަހައްޓަނީ ޚާއްސަ ކޮމިޓީއަކުން ކަމަށެވެ. އެގޮތުން 2019 ވަނަ އަހަރު 1400 މީހުންނަށް އެހީ ފޯރުކޮށްދިން ކަމަށާއި 2021 ވަނަ އަހަރު 1700 މީހުންނަށް އަދި 2022 ވަނަ އަހަރު 3000 މީހުންނަށް އެހީ ފޯރުކޮށްދިން ކަމަށް އޭނާ ވިދާޅުވިއެވެ.

އަދި މި އަހަރު މިހާތަނަށް 1500 މީހުންނަށް 6 މިލިއަން ރުފިޔާއަށްވުރެ ގިނަ ރުފިޔާ އެހީގެ ގޮތުގައި ފޯރުކޮށްދީފައިވާ ކަމަށް އަބްދުالله ޢަލީ ވިދާޅުވިއެވެ.

މިދިޔަ 3 އަހަރުގެ ތެރޭގައި ޒަކާތު ފަންޑުން ބޭސްފަރުވާގެ ހިދުމަތްތަކަށް 35 މިލިއަން ރުފިޔާ ހޭދަކޮށްފައިވާކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވެސް ވަނީ ވިދާޅުވެފައެވެ.

ޒަކާތުގެ ފައިސާ ބެހުމަށް އަމުރު ކުރައްވާފައިވަނީ އަށް ބަޔަކަށެވެ. އެގޮތުން ޒަކާތުގެ ފައިސާ ބަހާ އަށް ބަޔަކީ، ފަޤީރުންނާއި، މިސްކީނުންނާއި، އާމިލުންނާއި، މުއައްލިފަތު ގުލޫބުހުމް އަދި ދަރަނިވެރިންނާއި، އިބުނުއްސަބީލުގެ އިތުރުން އަޅުން މިނިވަން ކުރުމެވެ.