މިއަހަރު އަމީރުލްޙައްޖުގެ ގޮތުގައި ވަޑައިގަންނަވާ ބޭފުޅަކީ، ރައީސުލްޖުމްހޫރިއްޔާގެ ނައިބު ފައިޞަލް ނަސީމް ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހަމަޖައްސަވައިފިއެވެ.

ރައީސް އޮފީހުން މިއަދު ބުނީ 1444 ވަނަ އަހަރު ޙައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރާ ޙައްޖާޖީންގެ ކަންތައްތައް އިސްކޮށް ބެލެހެއްޓެވުމަށްޓަކައި، އަމީރުލްޙައްޖުގެ ގޮތުގައި ވަޑައިގަންނަވާނީ ފައިސަލް ކަމަށެވެ.

“ދިވެހި ޙައްޖާޖީންގެ އެންމެހާ ކަންކަމަށް ޚާއްޞަ ސަމާލުކަމެއް ދީގެން ހުރިހާ އިންތިޒާމުތަކެއް ވީހާވެސް ފުރިހަމަޔަށް ގެންދިޔުމަށް ބާރު އެޅުމަށްޓަކައި ސަރުކާރުން ކޮންމެ އަހަރަކުވެސް ދަނީ ގިނަ މަސައްކަތްތަކެއް ކުރަމުންނެވެ.” ރައީސް އޮފީހުން ބުނެފައިވެއެވެ.

ރާއްޖެއިން މި އަހަރު ހައްޖަށްދާ މީހުން ފުރުމަށް ހަމަޖެހިފައިވަނީ މާދަމާއިން ފެށިގެންނެވެ. އެގޮތުން މާދަމާ ފުރުމަށް ހަމަޖެހިފައި ވަނީ މޯލްޑިވްސް ހައްޖު ކޯޕަރޭޝަނުން ހައްޖަށްދާ މީހުންނެވެ.

މިއަހަރު ރާއްޖެއިން މީހުން ހައްޖަށް ގެންދިއުމުގެ ހުއްދަ ހައްޖު ކޯޕަރޭޝަންގެ އިތުރުން ދީފައިވަނީ އަލް ހަރަމައިން ހައްޖު އެންޑް އުމްރާ ގުރޫޕަށާއި ސިސިލްފަރު ހައްޖު އެންޑް އުމްރާ ގުރޫޕަށާއި އަލްމަނާސިކް ޕްރައިވެޓް ލިމިޓެޑަށެވެ.

ރާއްޖެއިން މިީހުން ހައްޖަށް ގެންދިއުމަށް ކޮންމެ އަހަރަކު ވެސް ރަސްމީ ކޯޓާގެ ގޮތުގައި ސައުދީ ސަރުކާރުން 1،000 ކޯޓާ ދެ އެވެ. އަމިއްލަ ކުންފުނިތަކަށް 270 ހައްޖު ކޯޓާ ދިނުމަށްފަހު ބާކީ 730 ކޯޓާ މިއަހަރު ޚާއްސަކޮށްފައިވަނީ ހައްޖު ކޯޕަރޭޝަނަށެވެ.