މިއަހަރުވެސް ބޮޑު ޖަމާއަތުގައި އަޟްޙާ ޢީދު ނަމާދުކުރުން އޮންނާނެ ކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން ބުނީ އެހެން އަހަރުތަކެކޭ އެއްގޮތަށް މިއަހަރުވެސް މޫސުން ތަންދޭނަމަ މާލޭގައި އަޟްޙާ ޢީދު ނަމާދު ބޮޑު ޖަމާޢަތުގައި ކުރާނެކަމަށެވެ.

ބޮޑު ޖަމާޢަތުގައި ޢީދު ނަމާދުކުރަން މާލޭގައި ހަމަޖެހިފައިވާ ތަންތަނަކީ، މާފަންނު ސްޓޭޑިއަމް އާއި، އިސްލާމީ މަރުކަޒު މައިދާނާއި، މަސްޖިލް މަލިކި ސަލްމާންގެ މާބްލް ސަރަޙައްދުގައެވެ.

ހުޅުމާލެ ފޭސް 1ގައި ބޮޑު ޖަމާޢަތުގައި ޢީދު ނަމާދުކުރާނީ ހުޅުމާލެ ސިންތެޓިކް ޓްރެކްގައެވެ. ހުޅުމާލެ ފޭސް 2ގައި ނަމާދުކުރަނީ ކްރިކެޓް ސްޓޭޑިއަމްގައެވެ. ބޮޑު ޖަމާއަތުގައި އަޟްޙާ ޢީދު ނަމާދުކުރުން ވިލިމާލޭގައި އޮންނަނީ ފުޓްބޯޅަ ދަނޑުގައެވެ.

އިސްލާމިކް މިނިސްޓްރީން ބުނީ ބޮޑު ޖަމާޢަތުގައި ޢީދު ނަމާދުކުރުމަށް ނިންމިނަމަވެސް މޫސުން ތަންނުދޭނަމަ ހުކުރުކުރާ ހުރިހާ މިސްކިތެއްގައިވެސް ޢީދު ނަމާދުކުރާނެކަމަށެވެ.

ހަމައެއާއެކު ބޮޑުޖަމާއަތުގައި ޢީދު ނަމާދުކުރި ނަމަވެސް ފިތުރު އީދެކޭ އެއްގޮތަށް، މާލެ ސަރަހައްދުގެ ބޮޑެތި މިސްކިތްތަކުގައި އީދު ނަމާދުކުރާނެކަމަށް މިނިސްޓްރީން ބުނެފައިވެއެވެ. އެ މިސްކިތްތަކުގެ ތަފުސީލު މިނިސްޓްރީގެ ވެބްސައިޓުން ލިބެން ހުންނާނެ ކަމަށްވެސް މިނިސްޓްރީން މަޢުލޫމާތުދެއެވެ.

ޢީދުނަމާދަށް ވަޑައިގަންނަވާ ފަރާތްތަކުން ސަމާލުކަން ދޭންވީ ކަންތައްތަކުގެ ތެރޭގައި ކޮންމެ ބޭފުޅަކުވެސް ގެއިން ވުޟޫކޮށްގެން އައުމާއި، އަމިއްލަ މުޞައްލައެއް ގެނައުމާއި، އަމިއްލަ ފެންފުޅިއެއް ގެނައުމާއި، ފައިވާންލާނެ ޕްލާސްޓިކް ނޫން ކޮތަޅެއް ގެނައުން ހިމެނެއެވެ.