މުންކަރާތްތަކުން އީދުގެ މަތިވެރިކަން ނަގާނުލުމަށް އިސްލާމިކް އޮގަނައިޒޭޝަން ފޯ ކަލްޗަރ އެންޑް ސިވިލައިޒޭޝަން (އައިއޯސީސީ)ގެ ރައީސް ޑރ. މުޙައްމަދު ޝަހީމް ޢަލީ ސަޢީދު ގޮވާލަށްވައިފިއެވެ.

ރާއްޖޭގެ ރަށެއްގައި މިފަހަރުގެ އަޟުޙާ ޢީދު ފާހަގަކުރުމަށް ބޭއްވި ސްޓޭޖް ޝޯއެއްގައި ނިވާކަންކުޑަ ހެދުން ރަމްޒުވާގޮތަށް ދިވެހިންތަކެއް ހެދުން އަޅައިގެން ނަށާ މަންޒަރު ފެންނަ ވީޑިއޯއެއް މީސް މީޑިއާގައި ދަނީ ދައުރުވަމުންނެވެ.

ދައުރުވަމުންދާ ވީޑިއޯއާ ގުޅިގެން ދީނީ ޢިލްމުވެރިޔާ ޑރ. ޝަހީމް ވިދާޅުވީ ޙައްޖުގެ މަތިވެރި އަޅުކަމާ ގުޅިގެން އަންނަ އަޟުޙާ އީދަކީ ނުހަނު މަތިވެރި މާތް ޢީދެއް ކަމަށެވެ. އަދި މިޢީދަކީ އެތައް ހެޔޮކަމެއް އެކުލެވިގެންވާ މާތް ދުވަސްތަކެއްގައި އަންނަ ޢީދެއްކަމަށާއި އެހެންކަމުން ޢީދުގައި މުންކަރާތްތަކަށް ޖާގަދީގެން ނުވާނެ ކަމަށް ޑރ. ޝަހީމް ވިދާޅުވިއެވެ.

“ފާހިޝް ނެށުންތަކާއި މުންކަރާތްތަކުން މިއީދުގެ މަތިވެރިކަން ނަގާލުމަކީ އެއްވެސް މުސްލިމަކު ކޮށްގެންވާނެ ކަމެއްނޫން.” ޑރ. ޝަހީމް ވިދާޅުވިއެވެ.

މާތް ﷲ ވަނީ ކީރިތި ޤުރުއާނުގައި މި ދުވަސްތަކަށް ތަޢުރީފުކުރައްވާފައި ކަމަށާއި އެހެންކަމުން ސަޤާފީކަންކަމާއި ކުޅިވަރާއި އެނޫންވެސް ކަންކަމުގައި އިސްލާމްދީނުގައި ނަހީކުރައްވާފައިވާ ކަމެއް ނުހިމެނޭ ކޮންމެ ކަމަކުން ޢީދުގައި އުފާފާޅުކުރެވޭނެ ކަމަށްވެސް ޑރ. ޝަހީމް ވިދާޅުވިއެވެ.

ނިވާކަންކުޑަ ހެދުން ރަމްޒުވާގޮތަށް ނަށާފައިވާ މައްސަލަ ރާއްޖޭގެ ގިނަ ދީނީ ޢިލްމުވެރިން ވަނީ ކުށްވެރި ކުރަށްވާފައެވެ. އެގޮތުން ޑރ. އިޔާޒް ވިދާޅުވީ މިފަދަ މުންކަރާތްތައް މަނާކޮށް ހުއްޓުވުމަކީ ކޮންމެ މީހަކުވެސް އެމީހެއްގެ ކުޅަދާނަކަން ހުރި މިންވަރަކުން ކުރަންޖެހޭ ކަމެއް ކަމަށެވެ.

ދައުރުވަމުންދާ ވީޑިއޯއިން ފެންނަ ނެށުމުގައި ބުރުގާ އަޅައިގެންތިބި އަންހެނުންވެސް ބައިވެރިވެފައިވާތީ ގިނަ ބައެއްގެ ފާޑުކިއުން އެކަމަށް ވަނީ އަމާޒުވެފައެވެ.