މިއަހަރުގެ އަޟްޙާ އީދު ފާހަގަ ކުރަމުން ދަނިކޮށް ސްވިޑަންގައި ކީރިތި ޤުރުއާނުގެ މުޞްޙަފެއް އަންދާލި މައްސަލަ ޖުމްހޫރީ ޕާޓީގެ ލީޑަރ އޮނަރަބަލް ޤާސިމް އިބްރާހިމް ކުށްވެރި ކުރަށްވައިފިއެވެ.

ސްވިޑަންގައި ހިންގި ޢަމަލު ކުށްވެރި ކުރަށްވަމުން ޤާސިމް ވިދާޅުވީ އިސްލާމްދީނާ ދެކޮޅަށް ހިންގާ މިފަދަ އަމަލުތައް ތަކުރާރު ކުރަމުން ދިޔުމަކީ ވަރަށް ކަންބޮޑުވާ ކަމެއް ކަމަށެވެ. އަދި އެފަދަ އަމަލުތައް ޖުމްހޫރީ ޕާޓީން ބަލައިނުގަންނާނެ ކަމަށް ޤާސިމް ވިދާޅުވިއެވެ.

ޤާސިމް ވިދާޅުވީ މިފަދަ އަމަލުތައް ހިންގުމަށްފަހު ޚިޔާލުފާޅުކުރުމުގެ މިނިވަންކަން ބަހަނާއެއްގެ ގޮތުގައި ދައްކައިގެން ނުވާނެ ކަމަށެވެ. އަދި މިއީ ބައިނަލްއަޤުވާމީ ހަމަޖެހުމާއި ތަފާތު ޚިޔާލުތައް ބަލައިގަތުމުގެ މަފްޙޫމާ ޚިލާފު ޢަމަލުތަކެއް ކަމަށް ޤާސިމް ވިދާޅުވިއެވެ.



"މިއީ އެއް ބަޔަކު އަނެއް ބަޔަކާ ގުޅިގެން ދިރިއުޅުމުގެ އުސޫލުތަކާ މުޅިން ޚިލާފު އަމަލުތަކެއް،" ގާސިމް ވިދާޅުވިއެވެ.

ސްވިޑަންގައި އަޟްޙާ ޢީދު ދުވަހާ ދިމާކޮށް މުޞްޙަފް އަންދައި ހިންގައިފައިވާ ހަޑިހުތުރު އަމަލު ދިވެހި ސަރުކާރުންވެސް ވަނީ ހަރުކަށި އިބާރާތުން ކުށްވެރިކޮށްފައެވެ.

މިފަދަ އިޙްތިރާމް ކުޑަ ޢަމަލު ތަކުރާރުވުމަކީ މުޅި ދުނިޔޭގެ އެތައް މިލިއަން މުސްލިމުންގެ ދީނީ ޝުޢޫރުތަކަށް ދެވޭ އަނިޔާއެއް ކަމަށާއި، ހަމައެކަނި ޚިޔާލުފާޅުކުރުމުގެ މިނިވަންކަމުގެ މައްޗަށް ބިނާކޮށް މިފަދަ އަމަލުތައް ހިންގުމަށް ހުއްދަ ދިނުމަކީ ބަލައިގަނެވޭނެކަމެއް ނޫންކަމަށްވެސް ދިވެހި ސަރުކާރުން ވަނީ ބުނެފައެވެ.