މޯލްޑިވްސް މީޑިއާ ކައުންސިލުން ކޮންމެ އަހަރަކު ދެމުންއަންނަ ނޫސްވެރިކަމުގެ އިނާމަށް ކުރިމަތިލުމަށް މިއަހަރު ހުޅުވާލި މުއްދަތު އިތުރުކޮށްފިއެވެ.

މިއިނާމަށް ކުރިމަތިލުމަށް މިއަހަރު އެންމެ ފުރަތަމަ ހުޅުވާލީ މިމަހުގެ 2 ގެ ނިޔަލަށެވެ. އެހެންނަމަވެސް މިހާރު މިވަނީ މިމުއްދަތު މިމަހުގެ 23ގެ ނިޔަލަށް އިތުރުކޮށްފައެވެ.

ޖުމުލަ 2 ކެޓެގަރީއަކުން 12 ދާއިރާއަކަށް ކުރިމަތިލެވޭ މި އިނާމަށް ކުރިމަތިލެވޭނީ މަދުވެގެން 9 މަސްދުވަހު މަސައްކަތްކޮށްފައިވާ ނޫސްވެރިންނަށެވެ. މިއީ ނޫސްވެރިކަމުގެ ދާއިރާއިން ކުރިއަށްދިއުމަށް ހިތްވަރުދިނުމުގެގޮތުންނާއި ނޫސްވެރިންކުރާ މަސައްކަތުގެ އަގު ވަޒަންކުރުމުގެގޮތުން މީޑިއާ ކައުންސިލުން ކޮންމެ އަހަރަކުވެސް ދެމުން އަންނަ އެވޯޑެކެވެ.

މިއަހަރުވެސް ނޫސް މަޖައްލާ ކެޓަގަރީއާއި، ބްރޯޑްކާސްޓިން ކެޓަގަރީ ހިމެނޭހެން 12 ދާއިރާއަކުން އިނާމުދޭނެއެވެ.

މިފަހަރުގެ ނޫސްވެރިކަމުގެ އިނާމު ދިނުމަށް ނިންމާފައިވާ ދާއިރާތަކުގެ ތެރޭގައި ތަޙްޤީޤީ ނޫސްވެރިކަން، ދެމެހެއްޓެނިވި ތަރައްޤީއާއި އިޖްތިމާޢީ ދާއިރާ، ސިޔާސީ، ޝަރުޢީ އަދި ޤާނޫނީ، ވިޔަފާރިއާއި އިޤްތިޞާދު، އަދި ކުޅިވަރުގެ ދާއިރާ ހިމެނެއެވެ. މީގެ އިތުރުން ފޮޓޯ ޖާރނަލިޒަމް، ވީޑިއޯ ޖާރނަލިޒަމް، ގްރެފިކްސްއާއި އިލެސްޓްރޭޝަންސް، ފީޗަރ، އުންމީދީ ނޫސްވެރިޔާ އަދި އަހަރުގެ އެންމެ މޮޅު ނޫސްވެރިޔާވެސް ހިމެނެއެވެ.

ނޫސްވެރިކަމުގެ އިނާމަށް ކުރިމަތިލާން ބޭނުންވާ ފަރާތްތަކަށް އެ ފުރުޞަތު މީޑިއާ ކައުންސިލުން މިހާރު ވަނީ މިމަހުގެ 23 ވާ އާދިއްތަ ދުވަހުގެ މެންދުރު 13:00 އާއި ހަމައަށް ހުޅުވާލާފައެވެ.