އިޒްރޭލުން ޝަހީދުކުރި ފަލަސްތީނު ރައްޔިތުންގެ އަދަދު 4000 އިން މައްޗަށް އަރައިފި ކަމަށް ފަލަސްތީނުގެ ހެލްތު މިނިސްޓްރީން ބުނެފިއެވެ.

ފަލަސްތީނުގެ ސިއްހަތާއި ބެހޭ ވުޒާރާގެ އޮފިޝަލަކު އަލްޖަޒީރާއަށް މަޢުލޫމާތު ދެމުން ބުނީ މިހާތަނަށް ޝަހީދުވި ފަލަސްތީނު ރައްޔިތުންގެ އަދަދު 4,137 އަށް އަރައިފައިވާ ކަމަށެވެ. އޭގެ ތެރޭގައި 1,661 ކުޑަކުދިން ހިމެނެއެވެ. އަދި 13,260 މީހުންނަށް އަނިޔާ ލިބިފައިވާ ކަމަށް ފަލަސްތީނުގެ ހެލްތު މިނިސްޓްރީއާއި ހަވާލާދީ އަލްޖަޒީރާއިން ރިޕޯޓްކޮށްފައި ވެއެވެ. ނޫރް ޝާމް ސަރަހައްދަށް ދިން ހަމަލާތަކުގައި ރޭގައި އެކަނިވެސް 13 މީހުން ޝަހީދުކުރިއެވެ. އޭގެ ތެރޭގައި 5 ކުޑަކުދިންވެސް ހިމެނެއެވެ.

ފަލަސްތީނުގެ ސިއްހަތާއި ބެހޭ ވުޒާރާއިން ބުނީ އިޒްރޭލުގެ ހަމަލާތައް ސީދާ ޣައްޒާގެ ހޮސްޕިޓަލްތައް ކައިރީގެ މަގުތަކަށް ފޮނުވަމުންދާ ކަމަށް ފާހަގަކުރެވޭ ކަމަށެވެ. އަދި މިހާރު 21 ހެލްތު ސެންޓަރަކާއި 7 ހޮސްޕިޓަލެއްގެ މަސައްކަތް ހުއްޓިފައިވާ ކަމަށް މިނިސްޓްރީން ބުނެފައި ވެއެވެ. އަދި މި ހަމަލާތަކުގައި އިއްޔެއާއި ހަމައަށް 44 ސިއްހީ މަސައްކަތްތެރިން ޝަހީދުވެފައިވާއިރު 70 ސިއްހީ މަސައްކަތްތެރިންނަށް އެކިވަރުގެ އަނިޔާތައް ލިބިފައިވާކަމަށް ފަލަސްތީނުގެ ހެލްތު މިނިސްޓްރީން މަޢުލޫމާތުދެއެވެ.

"އޮޕަރޭޝަންތައް ކުރަމުންދަނީ ބިންމަތީގައި އަދި ހޮސްޕިޓަލުގެ ކޮރިޑޯތަކުގައި. 23 އެމްބިއުލާންސެއް ހަލާކުކޯށްލައިފި." ފަލަސްތީނުގެ ހެލްތު މިނިސްޓްރީގެ އޮފިޝަލް ބުނެފައި ވެއެވެ.

މީގެ އިތުރަށްވެސް، ފަލަސްތީނުގައި ހުންނަ އދ.ގެ އެޖެންސީގައި މަސައްކަތްކުރާ 2 މުވައްޒަފަކު އިއްޔެ މަރުވިއިރު، މި ހަނގުރާމައިގައި ފަލަސްތީނުގައި މަސައްކަތްކުރަމުންދިޔަ އދ.ގެ ޖުމްލަ 16 މުވައްޒަފަކު މަރުވެފައިވާ ކަމަށް އދ. އިން ބުނެފައި ވެއެވެ.