މިމަހުގެ 7 ވަނަ ދުވަހު ހަމާސްއިން އިސްރާއީލުގެ ތެރެއަށް ވަދެ، ދިން ހަމަލާގައި އެ މީހުންގެ އަތްދަށުވި އެމެރިކާގެ 2 މީހަކު ދޫކޮށްލައިފިއެވެ.

ބައިނަލްއަގުވާމީ މީޑިއާތައް ބުނާގޮތުން ހަމާސްގެ ބެލުމުގެ ދަށުގައި ތިބި މީހުންގެ ތެރެއިން އެމެރިކާގެ ދެ މީހުން ދޫކޮށްލީ ގަތަރު މެދުވެރިވެގެން ކުރިއަށްދިޔަ މަޝްވަރާއެއްގެ ތެރެއިންނެވެ. ބެލެވޭ ގޮތުގައި މި މަޝްވަރާތައް ބާއްވާފައިވަނީ އެމެރިކާގެ ރައީސް ޖޯ ބައިޑަން މެދުއިރުމައްޗަށް އިއްޔެ ކުރެއްވި ދަތުރުފުޅުގެ ތެރެއިންނެވެ.

ހަބަރުތައް ބުނާގޮތުން ހަމާސްއިން ދޫކޮށްލި އެމެރިކާގެ ދެ މީހުން ހަވާލުކޮށްފައިވަނީ ރެޑްކްރޮސްގެ މީހުންނާއެވެ. އަދި މިހާރު އެ ދެމީހުން ގައުމަށް އެނބުރި ދަތުރުކުރަމުންދާކަމަށްވެސް ހަބަރުތައް ބުނެއެވެ.

މައުލޫމާތު އެނގޭ ފަރްތަކާއި ހަވާލާދީ ހަބަރުތައް ބުނާގޮތުން ދޫކޮށްލީ އަންހެނަކާއި އޭނާގެ އަންހެން ދަރިފުޅެވެ. އަދި އެ މީހުން ދޫކޮށްލީ އަންހެންމީހާއަކީ ބަލި މީހަކަށް ވެފައި، އިންސާނިއްޔަތަށްޓަކައި ކަމަށްވެސް ހަމާސްއިން ބުނެއެވެ.

"އިންސާނިއްޔަތުކަން އިސްކުރުމުގެ އިތުރުން، ބައިޑަންގެ ހުދުމުހުތާރު ސަރުކާރުން (ހަމާސްއާ ގުޅޭގޮތުން) ދައްކަމުންދަނީ ހަގީގަތާއި ހިލާފު ދޮގު ވާހަކަތަކެއްކަން އެމެރިކާގެ ރައްޔިތުންނާއި ދުނިޔެއަށް ސާބިތުކޮށްދޭން ބޭނުން." ހަމާސްގެ ތަރުޖަމާނު އޮބައިދާ ނެރުނު ބަޔާނުގައިވެއެވެ.

ހަބަރުތައް ބުނާގޮތުން ހަމާސްގެ ބެލުމުގެ ދަށުގައި އިސްރާއީލު ތެރެއިން އަތުލައިގަތް 200 ވަރަކަށް މީހުން އެބަތިއްބެވެ. އަދި އެ މީހުން ދޫކޮށްލެވޭނެ ގޮތެއް ހޯދުމަށް އެމެރިކާއާއި ޔަހޫދީން ދަނީ މަސައްކަތްކުރަމުންނެވެ. ނަމަވެސް އެކަމާއި ގުޅޭގޮތުން ހަމާސްއިން އެއްވެސް ވާހަކައެއް ދައްކާފައެއް ނުވެއެވެ.