އިޒްރޭލުން ފަލަސްތީނުގެ އިތުރު 4960 މީހުން ހައްޔަރުކޮށްފިއެވެ.

އަލް ޖަޒީރާއިން ރިޕޯޓްކުރިގޮތުގައި 7 އޮކްޓޫބަރުން ފެށިގެން އިޒްރޭލުން ވަނީ ފަލަސްތީނުގެ 4960 މީހުން ހައްޔަރުކޮށްފައެވެ. އޭގެ ތެރޭގައި ހިމެނޭ 4000 މީހުންނަކީ އިޒްރޭލުގައި މަސައްކަތްކުރާ ލޭބަރުންނެވެ. އަދި ފަލަސްތީނުގެ ހުޅަނގު އައްސޭރިން ހައްޔަރުކުރި މީހުންގެ އަދަދު 960 އަށް އަރާ ކަމަށް އަލްޖަޒީރާއިން ރިޕޯޓް ކޮށްފައިވެއެވެ.

އޭގެ ކުރީގައި އިޒްރޭލުގެ ޖަލުތަކުގައި ހައްޔަރުވެފައިތިބި ފަލަސްތީނު ރައްޔިތުންގެ އަދަދު 5،200 އަށް އަރައެވެ. އަލް ޖަޒީރާއަށް އެނގިފައިވާ ގޮތުގައި ކޮންމެ ދުވަހަކުވެސް އިޒްރޭލުން ދަނީ ފަލަސްތީނުގެ ކުށެއްނެތް މީހުން ހައްޔަރުކުރަމުންނެވެ. އޭގެ ތެރޭގައި ގިނަ އަދަދެއްގެ އަންހެނުން ވެސް ހިމެނެއެވެ.

މި ހުރިހާ އެންމެންވެސް ބައިތިއްބާފައިވަނީ އިޒްރޭލުގެ އެކި މިލިޓަރީ ބޭސްތަކުގައި ކަމަށް އަލްޖަޒީރާއިން ރިޕޯޓްކޮށްފައި ވެއެވެ. އަދި އެއީ ހިޓްލަރު ހިންގި ފަދަ ގަތުލުއާންމު ހިންގާ ޖަލުތަކެއް ކަމަށް ބައެއް ރިޕޯޓުތައް ސިފަކުރެއެވެ.

ފަލަސްތީން ސަރުކާރުން މަޢުލޫމާތުދޭގޮތުގައި އެހުރިހާ އެންމެންނާއި ދޭތެރޭ އިޒްރޭލުގެ އަސްކަރިއްޔާއިން އަމަލުކުރަމުންދަނީ ލާއިންސާނީ އަދި ނުރައްކާތެރި ގޮތަކަށެވެ.

"ހައްޔަރުކޮށްފައިވާ މީހުންނަށް ބޭސްފަރުވާ ބަންދުކޮށްފައި ވަނީ، ބަނޑުހައިހޫނުކަން ކުރިމަތިކުރުވާފަވޭ. ޖަލުގެ އެޑްމިނިސްޓްރޭޝަނުން ވަނީ ފެނާއި ކަރަންޓުވެސް ކަނޑާލާފައި. އެންމެނަށް ޖިސްމާނީ އަދި ނަފްސާނީ އަނިޔާވެސް ކުރޭ." އިންސާނީ ޙައްޤުތަކާއި ބެހޭ ޖަމިއްޔާއަކުން ބުނެފައި ވެއެވެ.

އެޖަމިއްޔާއިން ބުނީ ހައްޔަރުކޮށްފައިވާ މީހުންނަށް ކުރާ އަނިޔާތަކުން އެކިވަރުގެ ޒަހަމްތައް ލިބިފައިވާ ކަމަށެވެ. އަދި އެމީހުން ލަނދުގަންނަވާ ފަދަ ޙާލަތްތައް ކުރިމަތިކުރުވާ ކަމަށްވެސް ރިޕޯޓްގައި ވެއެވެ.

މިމަހުގެ ހަތްވަނަ ދުވަހުން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި މިހާތަނަށް ފަލަސްތީނުގެ އެތައް ހާސް މީހުން ޝަހީދުވެ، އެތައްބަޔަކަށް ބޮޑެތި ޒަހަމްތައް ލިބިފައިވެއެވެ. އިޒްރޭލުން ޣައްޒާއަށް މެދުކެނޑުމެއްނެތި ހަމަލާދެމުންދަނީ ފަލަސްތީނުގެ އިސްތިއުމާރީ ޙާލަތު ނައްތާލުމަށް ހަމާސް ޖަމާއަތުން އިޒްރޭލުގެ ރައްޔިތުން ތަކެއް ރަހީނުކުރިކަމުގެ ބަހަނާގައެވެ.