އިޒްރޭލުން ދެމުންގެންދާ އުދުވާނީ ހަމަލާގައި ޣައްޒާއިން ޝަހީދުވީ މީހުންގެ އަދަދު 5،000 އިން މައްޗަށް އަރައިފި ކަމަށް ފަލަސްތީނުގެ ހެލްތް މިނިސްޓްރީން ބުނެފިއެވެ.

ރޭގައި ޣައްޒާއަށް ދިން ބޮމުގެ ހަމަލާއިން އެކަނިވެސް ފަލަސްތީނުގެ 400 އަށްވުރެ ގިނަ މީހުން ޝަހީދުވިއެވެ. އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ޣައްޒާއަށް ދިން ހަމަލާތަކުގައި ޝަހީދުވީ މީހުންގެ ޖުމްލަ އަދަދު 5،087އަށް އަރާފައިވާ ކަމަށް އެޤައުމުގެ ހެލްތު މިނިސްޓްރީން ބުނެފައި ވެއެވެ. އޭގެ ތެރޭގައި، 2،055 ކުޑަކުދިންނާއި 1،119 އަންހެނުން ހިމެނެއެވެ.

މި ހަނގުރާމައިގައި ޒަޚަމްވީ ފަލަސްތީން މީހުންގެ އަދަދު 15،273އަށް ވަނީ އަރާފައެވެ. އިޒްރޭލުން މެދުކެނޑުމެއްނެތި ޣައްޒާއަށް ހަމަލާދެމުންގެންދާއިރު ފަލަސްތީނުގެ ހަމާސް ޖަމާއަތުން އިއްޔެގެ ވަގުތެއްގައި ވަނީ އިޒްރޭލު ސިފައިންނާއި ޘެކޮޅަށް ހަމަލާތަކެއް ބަދަލުކޮށްފައެވެ.

އިޒްރޭލުގެ ހަމަލާތައް ފަލަސްތީނުގެ އިތުރަށް ލުބްނާންގެ ސަރަހައްދަކަށާއި ސީރިއާގެ އެއާޕޯޓަށްވެސް މިފަހުން ވަނީ އަމާޒުވެފަވެއެވެ. އަދި އިއްޔެ މިސްރުގެ ސަރަހައްދީ ރޮނގަށް ވައިގެ މަގުން ދިން ހަމަލާއަކީ 'އޮޅިގެން' ދެވުނު ހަމަލާއެއް ކަމަށް އިޒްރޭލުގެ އަސްކަރިއްޔާއިން ބުނެފައި ވެއެވެ.

އިޒްރޭލުން ވަރުގަދައަށް ފަލަސްތީނުގެ ޢާންމުންނަށް ހަމަލާދެމުންގެންދަނީ ހަމާސް ޖަމާއަތުން އެޤައުމުގެ މީހުން ރަހީނުކޮށްފައިވާތީ ކަމަށް ބުނެއެވެ. ފަލަސްތީނުގެ އަލްއަޤްޞާ މިސްކިތް ހިފަން ޔަހޫދީން ކުރަމުންދާ މަސައްކަތް ނާކާމިޔާބު ކުރުމަށް ހަމާސް ޖަމާއަތުން ވަނީ 7 އޮކްޓޫބަރުގައި އިޒްރޭލުގެ އަވަށަކަށް ހަމަލާދީ އެތައް ސަތޭކަ ބަޔަކު ރަހީނުކޮށްފައެވެ.