ފަަލަސްތީނުގެ އެންމެ ތޮއްޖެހިފައިވާ އާބާދީއެއް އޮންނަ އަދި މިހާރު އިޒްރޭލުން ފަނާކުރަމުން ގެންދާ ޣައްޒާ ސިޓީއަށް އެހީ ފޮނުވުމަކީ އޮތް ހަމައެކަނި ހައްލު ނޫން ކަމަށް ފަލަސްތީނުގެ ރެޑް ކްރެސެންޓްގެ ޑިރެކްޓާ މަރްވާން ޖިލާނީ ވިދާޅުވެއްޖެއެވެ.

ޖިލާނީ ވިދާޅުވީ މިވަގުތު ޣައްޒާގެ ރައްޔިތުންނަށް އެރަށުގެ އެއްވެސް ދިމާލަކުން ސަލާމަތްތެރިކަމެއް ނެތް ކަމަށެވެ. އޭނާ ވަނީ އިޒްރޭލުން ކުރިއަށް ގެންދާ ޣައްޒާ ފަނާކުރުމުގެ މި ހަނގުރާމަ ހުއްޓުވައިދިނުމަށް ބައިނަލްއަގްވާމީ މުޖުތަމައަށް ގޮވާލައްވާފައެވެ.

"ޣައްޒާގެ ރައްޔިތުންނަށް އެހީ އިތުރުކުރުމަަކުން އެއްވެސް މާނައެއް ނެތް. ކަމެއް ކޮށްދެވުނު ކަމަށް ވާނީ މި ހަނގުރާމަ ހުއްޓުވައިގެން. މިކަން ހުއްޓުވާ ނުލައިފިއްޔާ، މިހާރު ތިބި ދުނިޔޭގެ ލީޑަރުންނަކީ ތާރީޚުގައި ނުބައިކޮށް ލިޔެވޭނެ ބައެއް." އޭނާ ވިދާޅުވެފައި ވެއެވެ.

އިއްޔެ އިޒްރޭލުން ވަނީ ޣައްޒާގެ ހުރިހާ މުވާސަލާތީ ގުޅުމެއް ކަނޑާލާފައެވެ. އެއީ މިހާތަނަށް އެޤައުމުން ކޮށްފައިވާ ކަމެއް ނޫނެވެ. މިވަގުތު ވައިގެ މަގުން ދެމުންގެންދާ ހަމަލާތަކުގެ އިތުރަށް އެއްގަމު މަގުން ހަމަލާތައް ފެށައިފިއްޔާ މިހާރު ހިނގަމުންދާ ޤަތުލުޢާންމު ދެގުނަ ވެގެންދާނެ ކަމަށް ޖިލާނީ ވިދާޅުވިއެވެ.

"އިޒްރޭލަށް ޤަތުލުޢާންމު ހިންގުމަށް ފެހި ސިގްނަލް ދިން ދުނިޔޭގެ ލީޑަރުންގެ އަތްތައް ކުށެއްނެތް އެތައް ޢާންމުންނެއްގެ ލެއިން ތަތްތެޅޭނެ." ޖިލާނީ ވިދާޅުވެފައި ވެއެވެ.

7 އޮކްޓޫބަރުގައި ފެށި މި ހަނގުރާމައިގައި އިޒްރޭލުން ދިން ހަމަލާތަކުގައި މިހާތަނަށް ޣައްޒާ އިން ޝަހީދުކޮށްލި މީހުންގެ އަދަދު 7،300 އަށްވުރެ މައްޗަށް ވަނީ އަރައިފައެވެ.

Israel has intensified its operations in Gaza amidst a communication blackout.

The Palestinian Red Crescent says that there is no safe place in Gaza and asks the world to demand the 'fighting stops now.' pic.twitter.com/eafT9M6BFA

— Al Jazeera English (@AJEnglish) October 27, 2023