މަސްތުވާތަކެތި ގަންނަންވެގެން ދަރިން ވިއްކި އިންޑިއާގެ ދެމަފިރިން ހައްޔަރުކޮށްފިއެވެ.

މުމްބާއިގެ ފުލުހުންނާއި ހަވާލާދީ މީޑިއާތަކުން ރިޕޯޓްކޮށްފައިވާ ގޮތުގައި ޝައްބީރް ޚާން އަދި ސާނިއާ ޚާން ވަނީ މަސްތުވާތަކެތި ގަންނަން ފައިސާ ހޯދުމަށްޓަކައި އެމީހުންގެ 2 އަހަރުގެ ދަރިފުޅާއި 1 މަހުގެ ތުއްތު ކުއްޖާ ވިއްކާލާފައެވެ. 2 އަހަރުގެ ފިރިހެން ކުއްޖާ 60،000 އިންޑިއާ ރުޕީސްއަށް ވިއްކާލާފައިވާއިރު އެއް މަހުގެ އަންހެން ކުއްޖާ ވިއްކާލާފައިވަނީ 14،000 އިންޑިއާ ރުޕީސްއަށެވެ.

މި މައްސަލައިގައި ތުހުމަތުކުރެވޭ މި ދެމަފިރިންގެ އިތުރުން އެކުދިން ވިއްކުމުގެ މަސައްކަތްކުރި އެޖެންޓް، އުޝާ ރާތޯޑް އަދި ޝަކީލް މަކްރާނީ ނަމަކަށް ކިޔާ މީހަކުވެސް ހައްޔަރުކުރިއެވެ. ފުލުހުން ވަނީ ވިއްކާލި އަންހެންކުއްޖާ ސަލާމަތްކޮށްފައެވެ. އެހެން ނަމަވެސް، 2 އަހަރުގެ ފިރިހެންކުއްޖާއަށް ވީގޮތް ނޭނގޭތީ، ފުލުހުން ދަނީ އެކުއްޖާ ހޯދުމުގެ މަސައްކަތް ކުރަމުންނެވެ.

"އަނދޭރީ ސަރަހައްދަށް ނިސްބަތްވާ މަސްތުވާތަކެއްޗަށް ދެވިހިފާފައިވާ ދެމަފިރިއެއް ވަނީ އެދެމީހުންނަށް ލިބިފައިވާ ދަރިން ވިއްކާލާފައި. މި ދެމަފިރިންނަށް އެޖެންޓެއްގެ ފަރާތުން ހުށަހެޅުން ލިބުމާއިއެކު، އެމީހުން ވަނީ ފައިސާގެ ބަދަލުގައި ދަރިން ވިއްކަން އެއްބަސްވެފަ. މިކަން ފުލުހުންގެ ސަމާލުކަމަށް އައީ އެދެމީހުންގެ އާއިލާއަށް އެކަން އެނގުނު ހިސާބުން. ފިރިހެންކުއްޖާ ގަތް މީހާއަކީ ކާކުކަން އަދި ޔަގީންކުރެވިފައި ނުވޭ. އަންހެން ކުއްޖާ ވިއްކާލާފައިވަނީ ޝަކީލް މަކްރާނީ ނަމަކަށް ކިޔާ މީހަކަށް." މުމްބާއިގެ ކްރައިމް ބްރާންޗުން ބުނެފައި ވެއެވެ.

ޝައްބީރްގެ ކޮއްކޮ ރުބީނާއަށް އެކަން އެނގުމާއިއެކު އޭނާ ވަނީ ވަގުތުން ފުލުހުންނަށް މައްސަލަ ހުށަހަޅާފައެވެ.