ފަލަސްތީނުގެ އިތުރު 39 މީހުން އިޒްރޭލުގެ ޖަލުތަކުން ދޫކޮށްލައިފިއެވެ.

މިއަދުގެ ވަގުތެއްގައި އިޒްރޭލުން ވަނީ އެމީހުން ފަލަސްތީނަށް ފޮނުވުމަށްޓަަކައި ރަފާ ބޯޑަރގައި ތިބި ރެޑް ކްރޮސްގެ އޮފިޝަލުންނާ ހަވާލުކޮށްފައެވެ. މި 39 މީހުންގެ ތެރޭގައި ހިމެނެނީ އެންމެ ތިން އަންހެނުން ކަމަށް ފަލަސްތީނުގެ އޮފިޝަލަކު މަޢުލޫމާތުދީފައި ވެއެވެ.

އެއާއެކު، ހަމާސްއިން ވަނީ އިޒްރޭލުގެ ބިމުން ރަހީނުކުރި 13 އިޒްރޭލު ރައްޔިތުންނާއި ތައިލޭންޑްގެ 3 މީހުންގެ އިތުރަށް ރަޝިޔާ މީހެއް ރެޑް ކްރޮސްއާއި ހަވާލުކޮށްފައެވެ. މިހާރު މިސްރުން ދަނީ އެމީހުން އަނބުރާ ޤައުމަށް ފޮނުވުމުގެ މަސައްކަތް ކުރަމުންނެވެ.

އިޒްރޭލުން މި މީޙުން މިނިވަންކޮށްފައިވާއިރު މިއަދަކީ އިޒްރޭލާއި ހަމާސްއާއި ދެމެދު ވެވުނު އެއްބަސްވުމަށް އަމަލުކުރާ 3 ވަނަ ދުވަހެވެ. އިޒްރޭލު ސަރުކާރާއި ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުން ވަނީ 4 ދުވަހަށް ހަނގުރާމަ މެދުކަނޑާލުމަށް އެއްބަސްވެފައެވެ. އަދި އެމުއްދަތުގެ ތެރޭގައި އިޒްރޭލުން ނުޙައްޤުން ޖަލުތަކުގައި ބަންދުކޮށްފައިވާ ފަލަސްތީން މީހުން މިިނިވަންކުރުމަށް މި އެއްބަސްވުމުގެ ޝަރުތެއްގެ ގޮތުގައި ކަނޑައެޅިފަވެއެވެ. ބަދަލުގައި ހަމާސްއިން ވަނީ އިޒްރޭލުގެ ބިމުން ރަހީނުކުރި މީހުން ދޫކުރަން އެއްބަސްވެފައެވެ.

އިޒްރޭލުން ޣައްޒާގައި ހަނގުރާމަ ކުރުން މެދުކަނޑާލިޔަސް، ރޭގެ ވަގުތެއްގައިވެސް އެޤައުމުގެ ސިފައިން ވަނީ ފަލަސްތީނުގެ ހުޅަނގު އައްސޭރިން 6 މީހުން ޝަހީދުކޮށްލާފައެވެ. 7 އޮކްޓޫބަރުން ފެށިގެން އިޒްރޭލުން ދެމުންގެންދާ ހަމަލާތަކުގައި 14،800 އަށްވުރެ ގިނަ ފަލަސްތީން މީހުން މިހާރު ވަނީ ޝަހީދުވެފައެވެ.