ފަލަސްތީނުގެ މިނިވަންކަމަށް މަސައްކަތްކުރާ ހަމާސްއިން ޣައްޒާގެ ޙާލަތު ދައްކާލުމަށް ސްޕޭސްއެކްސް އަދި އެކްސް މީސް މީޑިއާގެ ވެރިޔާ، އީލަން މަސްކަށް ދިން ދައުވަތަށް އިންކާރުކޮށްފިއެވެ.

ބިލިއަނަރ އީލަން ވަނީ ދާދި ފަހުން އިޒްރޭލުން ދިން ދައުވަތެއް ގަބޫލުކޮށް، އެޤައުމަށް ޒިޔާރަތް ކޮށްފައެވެ. އިޒްރޭލު ސަރުކާރުން ވަނީ ހަމާސްއިން ދިން ގެއްލުން ކަމަށްބުނެ، އީލަން ކުރިމަތީގައި ފޭކް ޕްރޮޕަގަންޑާއެއް ފަތުރާފައެވެ. އެއީ 7 އޮކްޓޫބަރުގައި ހަމާސްއިން ދިން ހަމަލާތަކުން ލިބުނު ގެއްލުންކަމަށް އިޒްރޭލުން ބުނެއެވެ. އެއަށްފަހު، ހަމާސްއިން ވަނީ ޣައްޒާއަށް އައުމަށް އިލަންއަށް ދައުވަތު ދީފައެވެ.

އިލަން ބުނީ މިވަގުތު ޣައްޒާއަށް ދިއުން ނުރައްކާތެރި ކަމަށެވެ. އެހެން ނަމަވެސް، މުސްތަގްބަލުގައި ކުރިއަރަމުންދާ ޣައްޒާއެއް ފެނުމަކީ ދެފަރާތަށްވެސް ފައިދާ ވާނެ ކަމެއް ކަމަށް އިލަން ބުނެފަވެއެވެ. މީގެ ކުރީގައި މި މަސްރަހާއި ބެހޭގޮތުން ވާހަކަދައްކަމުން އިލަން ބުނީ ހަމާސްގައި މުޅިންވެސް ތިބީ އިޒްރޭލުގެ ސަބަބުން ޔަތީމުވީ ކުދިން ކަމަށެވެ. އަދި ކުރިއަށް އޮތް ތަނުގައިވެސް އިތުރު ކުޑަކުދިން ބޮޑުވެގެން ހަމާސްއަށް ވަންނާނީ ބަދަލުހިފުމުގެ ރޫހުގައި ކަމަށް އިލަން ފާހަގަކުރިއެވެ.

ފޭސްބުކް އަދި އިންސްޓަގްރާމްގައި ފަލަސްތީނާއި ބެހޭ ޕޯސްޓުތައް ސެންސަރކުރަމުންދާއިރު އެކްސްއިން ދިޔައީ ޣައްޒާގެ ރައްޔިތުންނަށް އިޒްރޭލުން ކުރަމުންދާ އަނިޔާތައް ހާމަކުރާ ޕޯސްޓުތައް، އެއްވެސް ހުރަހެއް ނެތި ދައުރު ކުރަމުންނެވެ. އެކަމާއި އިޒްރޭލުން ވަނީ ނުރުހުން ފާޅުކޮށްފައެވެ. އޭރު އިލަން ބުނީ ކޮންމެ މީހަކަށްވެސް ޚިޔާލު ފާޅުކުރުމުގެ މިނިވަންކަން ލިބިގެންވާ ކަމަށެވެ.