މެލޭޝިއާގައި މޫސުން ގޯސްވެ ބޯކޮށް ވާރޭ ވެހުމާއެކު، ކުރިމަތިވި ފެންބޮޑުވުމުގެ ކާރިސާ އާއި ގުޅިގެން 27،000 މީހުން ރައްކާތެރި ސަރަހައްދުތަކަށް ބަދަލުކޮށްފިއެވެ.

ރިޕޯޓުތައް ބުނާގޮތުން މެލޭޝިއާގެ ހަ ސްޓޭޓެއްގައި ނުރައްކާތެރި މިންވަރަކަށް ވަނީ ފެންބޮޑުވެފައެވެ. މީގެ ތެރޭގައި ކެލަންޓަން، ޓެރެންގަނޫ، ޕަހަންގް، ޖޯހޯރު، ސެލަންގޯރ އަދި ސަބާ ސްޓޭޓްގެ ސަރަހައްދުތައް ހިމެނެއެވެ.

މެލޭޝިއާގެ ކަމާ ބެހޭ ވުޒާރާތަކުން ބުނާގޮތުން މި ސަރަހައްދުތަކުގައި ހަލުވިކަމާއެކު ފެންބޮޑުވެގެންދިޔައީ ބޯކޮށް ވެހުނު ވާރެއާއެކު އެސަރަހައްދުތަކުގައި ހިމެނޭ ކޯޜުތައް ފުރި ބަންޑުންވާން މެދުވެރިވުމުންނެވެ.

މީގެއިތުރުން ފެންބޮޑުވެފައިވާ ސަރަހައްދުތަކުން މީހުން ސަލާމަތް ކުރުމަށް 647 ފުލުހުންނާއި މެލޭޝިއާ ވޮލަންޓިއަރސް ކޯޕްސްގެ 154 ވޮލަންޓިއަރުންގެ އިތުރުން 35 ދޯންޏާއި 29 ލޮރީ އަދި 56 ހަތަރު ފުރޮޅުލީ އުޅަނދު މިހާރުވެސް ދަނީ ހަރަކާތްތެރިވަމުންނެވެ.

ރިޕޯޓުތައް ބުނާގޮތުން ފެންބޮޑު ވުމާއި ގުޅިގެން 27،000 މީހުން މިހާރުވެސް ތިބީ ވަގުތީ ހިޔާގެ ގޮތުގައި އެހީ ފޯރުކޮށްދިނުމަށް ގާއިމުކޮށްފައިވާ 211 ރިލީފް ސެންޓަރުގައެވެ.