މިދިޔަ އަޟްހާ އީދުގައި ދިވެހި ފިލްމީ ތަރިން ރަށްރަށުގައި ބޭއްވި ފަދަ ޝޯއެއް މާލޭގައި ބާއްވަން ތައްޔާރުވެއްޖެއެވެ.

ޝޯއާ ބެހޭ މައުލޫމާތު 'ރަސް އޮންލައިން' އާ ހިއްސާ ކުރަމުން މަޝްހޫރު ޕްރޮޑިއުސަރ ފާތިމަތު ނަހުލާ ބުނީ، މިއީ ފިލްމީ ދާއިރާގައި ތިބި މައިގަނޑު ހުރިހާ ފަންނާނުން ގުޅިގެން ބާއްވާ ޝޯއެއް ކަމަށެވެ.

އީދު ޝޯތައް އާއްމުކޮށް ބާއްވަނީ ރަށްރަށުގައިކަން ފާހަގަކޮށް ނަހުލާ ބުނީ، މި ޝޯގެ ބޭނުމަކީ މާލޭގައި ތިބި މީހުންނަށްވެސް މިދިޔަ އީދުގައި ބޭއްވި ޝޯތައް ބަލާލުމުގެ ފުރުސަތު ހޯދައިދިނުން ކަމަށެވެ. ރަށްރަށުގަ އީދު ޝޯތައް ވަރަށް ފޯރި ގަދަކޮށް ބޭއްވި ނަމަވެސް މާލޭގައި އެފަދަ ޝޯތައް ވަރަށް ނުބާއްވާކަން ނަހުލާ ފާހަގަ ކުރިއެވެ. އޭގެ ސަބަބަކަށް ނަހުލާ ބުނީ، އެއީ ހުރިހާ ސްޓާރުން އީދުގައި ރަށްރަށަށް ޝޯ ދޭން ދާތީ ކަމަށެވެ.

ބުރާސްފަތި އަދި ހުކުރު ދުވަހުގެ ރޭ ޝޯ ބާއްވަން ފުރަތަމަ ޕްލޭން ކުރި ނަމަވެސް، އޮލިމްޕަސް ލިބުމުގައި ދަތިތައް ހުރުމާއެކު، ޝޯ ބާއްވާނީ މާދަމާރޭ ކަމަށް ނަހުލާ ބުންޏެވެ. އަދި ޝޯގެ ޓިކެޓްތައް ގާތްގަނޑަކަށް ވިކި ހުސްވެފައި ވާކަން އޭނާ ފާހަގަ ކުރިއެވެ.

މި ޝޯގެ ޓިކެޓް އޮލިމްޕަހުން ލިބެން ހުންނާނެ ކަމަށް ނަހުލާ ބުންޏެވެ.