އީރާނާ އެކު އުފެދިފައިވާ ނުތަނަވަސްކަން އިތުރުވަމުންދާ ދަނޑިވަޅެއްގައި ނިރުބަވެރި އިސްރާއީލަށް ކުރާ ދަތުރުތައް ހަތް އެއާލައިނަކުން ކެންސަލްކޮށްފައިވާ ކަމަށް ބޭރުގެ މީޑިޔާ ތަކުން ރިޕޯޓުކޮށްފި އެވެ.

މީޑިޔާތަކުން ނެރެފައިވާ ރިޕޯޓުގައިވާ ގޮތުން ޑެލްޓާ، ޔުނައިޓެޑް އެއާލައިންސް، ލުފްތަންސާ، އޮސްޓްރިއަން އެއާލައިންސް، ބްރަސެލްސް އެއާލައިންސް، އަދި އެއާ އިންޑިއާ އިން ވަނީ އިސްރާއީލަށް ކުރިއަށް އޮތް ހުރިހާ ފްލައިޓެއް ކެންސަލްކޮށްފަ އެވެ.

މި ރިޕޯޓް ނެރެފައިވަނީ މިއަދު ހެނދުނުގެ ވަގުތެއްގައި ލުފްތާންސާގެ ފްލައިޓް މިއުނިކް އިން އިސްރާއީލަށް ދަތުރުކުރަމުން ގޮސް ސައިޕްރަސްގެ ލާނާކާއަށް ޖައްސާލުމަށްފަހު އެނބުރި ޖަރުމަނަށް ދިޔަ ފަހުންނެވެ. މި ފްލައިޓްގެ އިސްރާއީލަށް ޖައްސަން ތާވަލް ކުރި ނަމަވެސް ކެޕްޓަން ވަނީ އެގައުމުގައި ފްލައިޓް ޖައްސަން ދެކޮޅު ހަދާފައެވެ.

ފްލައިދުބައި އިން ޝެޑިއުލް ކޮށްފައިވާ ބައެއް ފްލައިޓްތައް ކެންސަލްކޮށްފައިވާ ކަމަށްވެސް ބޭރުގެ މީޑިޔާއިން ނެރުނު ރިޕޯޓުތަކުގައި ބުނެފައި ވެއެވެ.

މި ރިޕޯޓްތައް ބުނާ ގޮތުގައި ޓެލް އަވީވްގެ ބެން ގުރިއަން އެއާޕޯޓުގައި ގާތްގަނޑަކަށް 70،000 ދަތުރުވެރިން މިހާރު ނުފުރި ތިބިއިރު، ބައެއް މީހުން އިތުރު ކެންސަލްތަކެއް ދިމާވެއްޖެ ނަމަ ގައުމުން ބޭރަށް ކުރާ އެންމެ ފަހުގެ ފްލައިޓްތައް ނަގަން މަސައްކަތް ކުރަން މަޖުބޫރު ވާނެއެވެ.

ގިނަ އަދަދެއްގެ ފްލައިޓްތައް ކެންސަލްކޮށްފައި މި ވަނީ އީރާނުގެ ވެރިރަށް ތެހެރާނުގައި ހަމާސްގެ ލީޑަރު އިސްމާއީލް ހަނިއްޔާ އަވަހާރަކޮށްލި މައްސަލައަށް ރައްދު ދިނުމަށް އީރާނާއި ހަމާސްއިން ތައްޔާރުވަމުން ދަނިކޮށެވެ.