ޣައްޒާގެ ދެ ސްކޫލަކަށް ދިން ހަމަލާއެއްގައި އެތައް ބަޔަކު ޝަހީދުވެ، ގިނަ ބަޔަކު ޒަހަމްވެއްްޖެއެވެ.

މީގެ ކުޑަ އިރުކޮޅެއް ކުރިން އިސްރާއިލުން ދިން މިހަމަލާ އަމާޒުވެފައިވަނީ ޣައްޒާ ސިޓީގެ ހަސަން ސަލާމާ އަދި އަލް ނަސްރް ނަމަކަށް ކިޔާ ދެ ސްކޫލަކަށެވެ.

މިހަމަލާގައި ފަލަސްތީނުގެ 25 މީހަކު ވަނީ ޝަހީދުވެފައެވެ. އަދި 60 އަށް ވުރެއް ގިނަ މީހުން ވަނީ ޒަހަމްވެފައެވެ.

ރިޕޯޓުތައް ބުނާގޮތުން މިހަމަލާގައި ޝަހީދުވެފައިވާ މީހުންގެ ތެރޭގައި ގިނައީ ކުޑަކުދިންނެވެ.

މިހަމަލާ އާއިގުޅިގެން، ޣައްޒާގައި ހުންނަ ފަލަސްތީނުގެ ސިވިލް ޑިފެންސްގެ ތަރުޖަމާނު މަހްމޫދު ބަސާލް ވަނީ އިސްރާއީލު ސިފައިން އަލް ނަސްރު އަދި ހަސަން ސަލާމާ ސްކޫލަށް ދިން ހަމަލާ ގަތުލުއާންމެއްގެ ގޮތުގައި ސިފަކުރައްވާ، ސްކޫލްތަކުން ފެނުނު މަންޒަރުތަކަކީ "ހިތަށް އުނދަގޫ އަދި ހިތާމަވެރި" މަންޒަރުތަކެއް ކަމަށް ވިދާޅުވެފައެވެ. އޭނާ ވިދާޅުވީ، މިހަމަލާގައި ޒަޚަމްވި މީހުންގެ 80 އިންސައްތަ އަކީ ކުޑަކުދިން ކަމަށެވެ.

އިއްޔެވެސް އިސްރާއީލުން ވަނީ ޣައްޒާގެ ދެ ސްކޫލަކަށް ހަމަލާދީ އެތައް ބަޔަކު ޝަހީދުކޮށްލާފައެވެ.

ފަލަސްތީނުގެ ގިނަ ސްކޫލްތަކަކީ، ގެދޮރު ދޫކޮށް ދާން މަޖުބޫރުވެފައިވާ ފަލަސްތީނުގެ ރައްޔިތުން ބޯހިޔާވަހިކަން ހޯދަމުންދާ ތަންތަން ކަމަށް ރިޕޯޓުތައް ބުނެއެވެ.

ފާއިތުވި އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި 39،000 އަށްވުރެ ގިނަ މީހުން ޝަހީދުވެ 91،000 އަށްވުރެ ގިނަ މީހުން ވަނީ ޒަޚަމްވެފައެވެ.