ބަންގްލަދޭޝްގައި ސަަރުކާރާ ދެކޮޅަށް ކުރަމުންދާ މުޒާހަރާތައް ހޫނުވެ، ފުލުހުންނާއި އާންމުންގެ މެދުގައި ހިނގަމުންދާ ކުރިމަތިލުންތަކުގައި އާދީއްތަ ދުވަހު އެކަނިވެސް 90 އަށްވުރެއް ގިނަ މީހުން މަރުވެފައިވާކަމަށް ރިޕޯޓުކޮށްފިއެވެ.

ސަރުކާރާ ދެކޮޅަށް ކުރާ މުޒާހަރާތައް ފެށިގެންދިޔައީ ސިވިލް ސަރވިސްގެ ވަޒީފާތަކުގެ ތެރެއިން، ތިންބައިކުޅަ އެއްބައި، 1971 ވަނަ އަހަރު ޕާކިސްތާނާ ދެކޮޅަށް ކުރި ހަނގުރާމައިގައި ބައިވެރިވި ބަންގްލަދޭޝް ސިފައިންގެ އާއިލާ މީހުންނަށާއި ގާތްތިމާގެ މީހުންނަށް ހާއްސަކޮށްފައިވާ ކޯޓާއަކާ ގުޅިގެންނެވެ. މިދިޔަ މަހު ފެށި މިމުޒާހަރާތައް ލީޑު ކުރަނީ ކޮލެޖާއި ޔުނިވަރސިޓީތަކުގައި ކިޔަވަމުންދާ ދަރިވަރުންނާއި ބަންގްލަދޭޝްގެ ޒުވާނުންނެވެ.

ޖުލައިމަހުން ފެށިގެން މެދުކެނޑުމެއް ނެތި ކުރަމުންދާ މި މުޒާހަރާތަކުގައި، ފުލުހުންނާއި އާންމުންގެ ކުރިމަތިލުންތަކުގައި 280 އެއްހާ މީހުން މަރުވެފައިވާކަމަށް ރިޕޯޓުތައް ބުނެއެވެ. މިހަމަނުޖެހުމުގެ ތެރެއިން ފުލުހުންނަށް ނުކިޔަމަންތެރިވުމުގެ ތުހުމަތުގައި 10،000 އަށްވުރެއް ގިނަ މީހުން ވަނީ ހައްޔަރުވެސްކޮށްފައެވެ.

މިހަމަނުޖެހުންތަކާއި ގުޅިގެން ސަރުކާރުގެ ސިވިލް ސަރވިސް ވަޒީފާތައް ދިނުމުގެ އުސޫލަށް ބަދަލު ގެނެސް ވަކި ބަޔަކަށް ވަޒީފާ ހާއްސަކުރުމަށް ހެދި ކޯޓާ ސަަރުކާރުން ހުސްވިމަހު ވަނީ މަދުކޮށްފައެވެ. ނަމަވެސް ދަރިވަރުން ވަނީ މުޒާހަރަތައް މެދު ކަނޑާނުލާ، ފުލުހުންގެ އަނިޔާވެރިކަމުގެ ސަބަބުން މަރުވެ އަދި އަނިޔާވި މުޒާހަރާގެ ބައިވެރިންނަށް އިންސާފު ހޯދައިދިނުމަށް އެދި ގޮވާލަމުންނެވެ. އަދި މިހާރު މުޒާހަރާގެ ބައިވެރިން ބޭނުންވަނީ ބަންގްލަދޭޝްގެ ބޮޑުވަޒީރު ޝެއިޚް ހަސީނާ މަގާމުން ވަކިކުރުވާށެވެ.

ބަންގްލަދޭޝްގައި މެދުކެނޑުމެއްނެތި ސަަރުކާރާ ދެކޮޅަށް ކުރަމުންދާ މުޒާހަރާތައް ހޫނުވެފައިވާއިރު، މިކަން ކޮންޓްރޯލް ކުރުމަށްކަމަށް ބުނެ ބަންގްލަދޭޝްގެ ބައެއް ސަރަހައްދުތަކުގައި އިންޓަރނެޓް ބޭނުން ނުކުރެވޭ ގޮތް ހަދައި، ވަކި ވަގުތުތަކެއްގައި ބޭރަށް ނުކުމެ އުޅުން މަނާކޮށް ކާފިއުވެސް ވަނީ އިއުލާންކޮށްފައެވެ.