25 އަހަރު ތެރޭގައި ފުރަތަމަ ފަހަރަށް ޣައްޒާއިން ޕޯލިއޯ ކޭސް އެއް ރެކޯޑް ކޮށްފިއެވެ.

ފަލަސްތީނުގެ ހެލްތު މިނިސްޓްރީން ބުނީ ޣައްޒާގައި އުމުރުން އެންމެ ދިހަ މަހުގެ ތުއްތު ކުއްޖަކަށް ޕޯލިއޯ ޖެހިފައިވާކަން ފާހަގަކުރެވިފައިވާ ކަމަށާއި މި ދަނޑިވަޅުގައި ޕޯލިއޯ ވެކްސިން ކެމްޕޭނެއް ހިންގުމަށް ހަމަލާތައް މަޑުޖައްސާލުމަށް އދ. އިން އިލްތިމާސްކޮށްފައިވާކަމަށެވެ.

އިސްރާއީލުން ޣައްޒާއަށް ދެމުންގެންދާ ހަމަލާތައް ހުއްޓާލުމުގެ މަޝްވަރާތައް ދޯހާގައި ކުރިއަށް ގެންދާއިރު އެ މަޝްވަރާރަތައް ވަރަށް ސީރިއަސް ކަމަށާއި އެއީ ބިނާކުރަނިވި، އަދި ހެޔޮ މާހައުލެއްގައި ކުރިއަށްދާ މަޝްވަރާތަކެއް ކަމަށް މިސްރާއި ގަތަރާއި އެމެރިކާ ގުޅިގެން ދާދިފަހުން ނެރުނު ބަޔާނެއްގައި ބުނެފައި ވެއެވެ.

ހަމަލާތަކުގެ ތެރެއިން އިސްރާއީލުން ވަނީ ޣައްޒާގެ ދެކުނުން މީހުން ނެރުމުގެ އާ އަމުރުތަކެއް ނެރެފައެވެ. އޭގެ ތެރޭގައި މީގެ ކުރިން "އިންސާނީ ރައްކާތެރި ސަރަހައްދެއްގެ" ގޮތުގައި ޚާއްސަކުރި ބައެއް ސަރަހައްދުތައް ވެސް ހިމެނޭ ކަމަށް ރިޕޯޓްތައް ބުނެއެވެ.

ނިރުބަވެރި އިސްރާއީލުން “ރައްކާތެރި ސަރަހައްދެއް” ކަމަށް ކިޔަމުން އަންނަ އަލްމަވާޞީއަށް ދާދިފަހުން ދިން ވައިގެ ހަމަލާތަކުގައި ފަލަސްތީނުގެ ދެ މީހަކު ވަނީ މަރުވެފައެވެ.

އިސްރާއީލުން ޣައްޒާއަށް ދެމުންގެންދާ ޢުދުވާނީ ޙަމަލާތަކުގައި 40،005 މީހުން މަރުވެ 92،401 މީހުންވަނީ ޒަޚަމްވެފައެވެ.