1984 ވަނަ އަހަރު ރިލީޒް ކުރި އިންޑިއާނާ ޖޯންސް އެންޑް ދަ ޓެމްޕަލް އޮފް ޑޫމްގައި ބޭނުންކުރި ތޮތްޕެއް 6 ލައްކަ ޑޮލަރަށް ވިއްކާލައިފިއެވެ.

އޮކްޝަނެއްގައި ވިއްކާލި، ފެޑޯރާ ބްރޭންޑުގެ މި ތޮތްޕަކީ އިންޑިއާނާ ޖޯންސް އެންޑް ދަ ޓެމްޕަލް އޮފް ޑޫމްގެ ލީޑު ރޯލު، އިންޑިއާނާ ޖޯންސް ބޭނުންކުރާ ތޮތްޕެކެވެ. އެގޮތުން މިރޯލު ކުޅެދިން ހެރިސަން ފޯޑް އަދި އޭނާގެ ސްޓަންޓް ޑަބަލް ވަނީ މިތޮފި އަޅައިގެން ފިލްމުގެ އެކި ސީންތަކުގައި ހަރަކާތްތެރިވެފައެވެ.

ޒަމާންވީ ފިލްމުތަކުގެ މުދާ ވިއްކާލުމަށް މިދިޔަ ބުރާސްފަތި ދުވަހު ލޮސް އެންޖެލިސްގައި ކުރިއަށްދިޔަ މި އޮކްޝަންގައި، އިނގިރޭސި ފިލްމު އިންޑިއާނާ ޖޯންސް އެންޑް ދަ ޓެމްޕަލް އޮފް ޑޫމްގެ އިތުރުން، ސްޓަރ ވޯޒް، ހެރީ ޕޮޓާ އަދި މަޝްހޫރު ޖޭމްސް ބޮންޑް ކެރެކްޓަރ ފެނިގެންދާ ފިލްމުތަކުގެ ބައެއް މުދާ ވަނީ އޮކްޝަންކޮށްފައެވެ. މީގެ ތެރޭގައި ތަރިން ލައި އުޅުނު ހެދުމާއި، ގަހަނާ ތޮފި އަދި އެކި ސީން ތަކުން ފެންނަ އެކި ޒާތްޒާތުގެ މުދާ ހިމެނެއެވެ.



މި އޮކްޝަންގައި ވިއްކާލި އިންޑިއާނާ ޖޯންސް އެންޑް ދަ ޓެމްޕަލް އޮފް ޑޫމްގައި ބޭނުންކުރި ތޮފި ވިއްކާލައިފައިވަނީ 630،000 އެމެރިކާ ޑޮލަރަށެވެ. މިއާއެކު މިތޮފި ވެގެންދިޔައީ މި އޮކްޝަންގައި އެންމެ މަތީ އަގަކުން ވިކުނު އެއް މުދަލަށެވެ.