ދުނިޔޭގެ ބައެއް ގައުމުތަކުގައި ހަލުވިކަމާއެކު ފެތުރެމުންދާ މަކުނު ވިދުރި ނުވަތަ މަންކީޕޮކްސްއަށް ވެކްސިނެއް އުފެއްދުމުގެ މަސައްކަތް ފަށައިފިއެވެ.

އެފްރިކާގެ ގައުމުތަކުގައި ހަލުވިކަމާއެކު މި ބަލި ފެތުރި ގިނަ ބަޔަކު މަރުވުމާއެކު ދުނިޔޭގެ ސިއްހަތާ ބެހޭ ޖަމިއްޔާ، ޑަބްލިޔުއެޗްއޯ އިން ވަނީ ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައެވެ. މިއީ އެ ޖަމިއްޔާއިން ނެރޭ އެންމެ މަތީ ދަރަޖައިގެ އެލާޓެވެ. އަދި އޭގެ ދުވަސްކޮޅެއް ފަހުން ސްވެޑެން އިން މި ބަލި ފެނިފައިވާއިރު މިހާރު ޕާކިސްތާނުން ވެސް ވަނީ މި ބަލި ފެނިފައެވެ.

އިންޑިއާގެ ސީރަމް އިންސްޓިޓިއުޓާއި ހަވާލާދީ އެންޑީޓީން ބުނީ މަކުނު ވިދުރި އަށް ވެކްސިނެއް އުފެއްދުމުގެ މަސައްކަތް މިހާރު ކުރަމުން އަންނަ ކަމަށާއި، އެއް އަހަރު ދުވަހުގެ ތެރޭގައި ރަނގަޅު ނަތީޖާތަކެއް އަންނާނެ ކަމަށް ބެލެވޭ ކަމަށެވެ.

ސީރަމް އިންސްޓިޓިއުޓް އޮފް އިންޑިޔާގެ ސީއީއޯ އަދާރް ޕޫނާވާލާ ވަނީ މަކުނު ވިދުރި ފެތުރުމާ ގުޅިގެން މުޅި ދުނިޔޭގައި އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތަށް ރިއާޔަތްކޮށް އޭނާގެ ކުންފުނިން މި ބައްޔަށް ހާއްސަ ވެކްސިނެއް އުފެއްދުމުގެ މަސައްކަތް ކުރަމުންދާ ކަމަށް ބުނެފައެވެ.

މަކުނު ވިދުރި ޖެހުމުން އެންމެ ފުރަތަމަ ފެންނަ އަލާމާތްތަކުގެ ތެރޭގައި ހުން އައިސް މީހާގެ ވަރުދެރަވެއެވެ. އަދި ފަހުން ގައިން ދިޔަ ހެދޭ ބިހިތަކެއް ނަގައެވެ. މި ބައްޔަކީ ފަރުވާ ދިނުމުން ރަނގަަޅުވާ ބައްޔެއް ނަމަވެސް، ސީރިއަސް ހާލަތްތަކުގައި ފުރާނަައަށް ނުރައްކާވެއެވެ.

މި ބައްޔަކީ ގައިން ގަޔަށް އަރާ ބައްޔެއް ކަމަށް ވާއިރު މި ބަލި ފެތުރުން ކޮންޓްރޯލް ކުރުމަށް ގައުމުތަކުން މިހާރު ވަނީ ފިޔަވަޅުތައްވެސް އަޅާފައިކަން ފާހަގަ ކުރެވެއެވެ.