ދުނިޔޭގެ އެންމެ ދުވަސްވީ މީހާ، މާރިއާ ބްރަނިއާސް އުމުރުން 117 އަހަރުގައި ސްޕެއިންގައި މަރުވެއްޖެ އެވެ.

މާރިއާ ބްރަނިއާސް މަރުވީ އޭނާ ސްޕެއިންގެ ނާސިން ހޯމެއްގައި ހުއްޓައެވެ. އޭނާ ވަނީ ދުނިޔޭގެ ބޮޑު ދެ ހަނގުރާމަ ތަޖުރިބާކޮށް ފާއިތުވި 117 އަހަރުގައި ދުނިޔޭގައި ހިނގާފައިވާ ތާރީހީ މުހިންމު އެތައް ހާދިސާތަކެއް ތަހައްމަލުކޮށްފަ އެވެ.

ގިނިސް ވޯލްޑް ރެކޯޑްސް އިން ދިރިހުރި އެންމެ ދުވަސްވީ މީހާ ކަމަށް ބްރަނިއާސް ކަނޑައަޅާފައި ވަނީ 2023 ވަނަ އަހަރުގެ ޖެނުއަރީ މަހު އެވެ.

ބްރަނިޔާސްގެ އަންހެން ދަރިފުޅު މީސް މީޑިޔާގައި ކުރި ޕޯސްޓެއްގައި ބުނީ އޭނާގެ މަންމަ މަރުވީ ނިދީގައި އޮތްވާ ކަމަށެވެ. އަދި މަންމަ މި ހަފްތާ ކުރީކޮޅު އެންމެންނާ ވަކިވާން އުޅޭކަމުގެ އިހުސާސް ކުރެވިގެން އެވާހަކަ ހިއްސާކުރަމުން އެކަމާ ދެރަ ނުވުމަށްވެސް ބުނެފައިވާ ކަމަށްވެސް އަންހެން ދަރިފުޅު ވަނީ ބުނެފައެވެ.

މާރިޗް 4، 1907 ގައި ކެލިފޯނިއާގެ ސެން ފްރެންސިސްކޯއަށް އުފަން ބްރަނިއާސް އާއިލާއާއެކު ސްޕެއިންގެ ކެޓަލޯނިއާ ސަރަހައްދަށް ބަދަލުވީ އުމުރުން އެންމެ ހަތް އަހަރުގަ އެވެ.

1918 ވަނަ އަހަރުގެ ސްޕެނިޝް ފްލޫ ބަލިމަޑުކަމާއި، 1936-1939 އަށް އެގައުމުގައި ހިނގި ދާޚިލީ ހަނގުރާމައާއި، ދުނިޔޭގެ ބޮޑެތި ހަނގުރާމަތަކާއި، އެންމެ ފަހުން މުޅި ދުނިޔެ ސިއްސުވާލި ކޮވިޑް-19 ގެ ބަލިމަޑުކަންވެސް ބްރަނިއާސް ވަނީ ތަޖުރިބާ ކޮށްފައެވެ.

އުމުރުން 117 އަހަރުގެ ބްރަނިއާސް ހިމެނެނީ ގިނިސް ރެކޯޑްގެ ތާރީހުގައި 12 ވަނައަށް އެންމެ ދުވަސްވީ މީހާގެ ގޮތުގައި އެވެ. އޭގައި އެންމެ ދޮށީ މީހަކަށް ރިކޯޑު ކުރެވިފައި ވަނީ ޖީން ކަލްމެންޓް ކިޔާ ފްރާންސް އަށް ނިސްބަތްވާ އަންހެނެކެވެ. އޭނާ ދިރިއުޅުނީ 122 އަހަރާއި 164 ދުވަހަށެވެ.