ސުލްހައިގެ އެއްބަސްވުން ކުރިޔަށް ދަނިކޮށް ނިރުބަވެރި އިސްރާއީލުން ޣައްޒާގެ ބާޒާރަކާއި ސްކޫލަކަށް ދިން ބޮމުގެ ހަމަލާއެއްގައި ކުޑަކުދިން ހިމެނޭގޮތަށް 20 މީހަކު ޝަހީދުކޮށްލައިފިއެވެ.

ޣައްޒާގެ އެކި ހިސާބުތަކަށް ދެމުންދާ ހަމަލާތަކުގެ ތެރެއިން މިފަހަރު ހަމަލާ އަމާޒުވީ އެގައުމުގެ މެދުތެރޭގެ ޑެއިރް އެލް ބާލާގެ ގިނަ ބަޔަކު އެއްވެފައި ތިބި ބާޒާރަކަށާއި ގެދޮރު ގެއްލިފައިވާ މީހުން ބޯހިޔާވަހިކަން ހޯދަމުން ދިޔަ ސްކޫލަކަށެވެ.

އަލްޖަޒީރާ އިން ރިޕޯޓްކުރާ ގޮތުގައި މި ހަމަލާގައި ބާޒާރުން އަށް މީހުން ވަނީ ޝަހީދުވެފައެވެ. އަދި ހަމަލާގައި ޒަޚަމްވި ގިނަ މީހުން އަލްއަގްސާ ހޮސްޕިޓަލަށް ގެންދެވުނު ކަމަށާއި އޭގެ ތެރޭގައި ގިނައީ ކުޑަކުދިން ކަމަށް އެ ނޫހުން ރިޕޯޓު ކުރެއެވެ.

"ކުޑަކުދިން ހިމެނޭ ގޮތަށް މަދުވެގެން 10 ފަލަސްތީނު މީހުން އަދިވެސް އައިސީޔޫގައި އެބަތިބި،" އޭގެ ތެރެއިން ގިނަ މީހުންގެ ހާލު ސީރިއަސް” އަލްޖަޒީރާ އިން ރިޕޯޓުކޮށްފައި ވެއެވެ.

އިސްރާއީލުން ހަމަލާދިން ސްކޫލަކީ ގެދޮރު ގެއްލިފައިވާ ފަލަސްތީނުގެ 700 އެއްހާ މީހުން ހިޔާވަހިކަން ހޯދަމުން ދިޔަ ސްކޫލެއް ކަމަށް ޣައްޒާގެ ސިވިލް ޑިފެންސް އޮތޯރިޓީން ބުނެ އެވެ.

ފާއިތުވި އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 40،173 އަށް ވުރެ ގިނަ މީހުން ވަނީ މަރުވެފައެވެ. އަދި ހަމަލާތަކުގައި މިހާތަނަށް ޒަޚަމްވެފައިވާ ކަމަށް 92،857 މީހުން ރިޕޯޓް ކުރެވިފައިވާކަމަށް ޣައްޒާގެ ލޯކަލް ހެލްތު އޮތޯރިޓީތަކުން ބުނެ އެވެ.