ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ކިއޮސްކު ކުއްޔަށް ދޫކުރަން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއުލާން ކޮށްފިއެވެ.

އެޗްޑީސީން ކުރި އިއުލާނެއްގައި ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ 20 ކިއޮސްކް ކުއްޔަށް ހިފުމަށް ޝައުޤުވެރިކަން ފާޅުކުރުމަށް ވަނީ ފުރުސަތު ހުޅުވާލައިފައެވެ. ކިއޮސްކްތައް ކުއްޔަށް ހިފާނެ ފަރާތެއް ކަނޑައެޅޭނީ ޝަރުތު ހަމަވާ ފަރާތްތަކުގެ މެދުގައި ނެގޭ ގުރުއަތުން ކަމަށް އެ ކޯޕަރޭޝަނުން ވަނީ ބުނެފައެވެ.

ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ކިއޮސްކްތައް ކުއްޔަށް ހިފުމަށް ބޭނުންވާ ފަރާތްތަކަށް ފޯމު ވިއްކުން ހަމަޖެހިފައިވަނީ މިމަހުގެ 25 އިން އަންނަ މަހުގެ 5 ވަނަ ދުވަހުގެ ނިޔަލަށް ރަސްމީ ބަންދު ނޫން ދުވަސް ދުވަހު، ސެންޓްރޯ މޯލް ގްރައުންޑް ފުލޯގައި ހުންނަ އެޗްޑީސީގެ ފުރަންޓް އޮފީހުންނެވެ.

އެޗްޑީސީން ބުނީ ކިއޮސްކް ކުއްޔަށް ހިފުމަށް ބޭނުންވާ ފަރާތްތަކަށް ފޯމު ހުށަހެޅުމުގެ ފުުރުޞަތު ހުޅުވާލާފައިވަނީ މިމަހުގެ 25 އިން އަންނަ މަހުގެ ފަސް ވަނަ ދުވަހުގެ ނިޔަލަށް ކަމަށެވެ. އަދި ރަސްމީ ދުވަސްދުވަހު ސެންޓްރޯ މޯލް ގްރައުންޑް ފުލޯގައި ހުންނަ އެޗްޑީސީގެ ފުރަންޓް އޮފީހުން ފޯމް ބަލައިގަންނާނެއެވެ.

އެޗްޑީސީން ބުނި ގޮތުގައި ގުރުއަތު ނެގުން އޮންނާނީ އަންނަ މަހުގެ 19 ވަނަ ދުވަހު ކަމަށާއި، ގުުރުއަތު ނެގުމަށް ހަމަޖެހިފައިވާ ތަނުގެ މަޢުލޫމާތު ފަހުން އަންގާނެ ކަމަށެވެ.