ލުބުނާންގެ ހަމަލާތަކެއް އަނެއްކާވެސް އިސްރާއީލްގެ ދެކުނުގެ ސަރަހައްދުތަކަށް އަމާޒުވެއްޖެއެވެ.

މިނިވަން ކަމަށް ޖިހާދުކުރަމުންދާ ފަލަސްތީނުގެ ހައްގުގައި ވަކާލާތު ކުރަމުންދާ ހަމާސް ޖަމާއަތަށް ތާއީދުކޮށް ޔަހޫދީންގެ ޣައިރު ޤާނޫނީ ދައުލަތް އިސްރާއީލްގެ އަނިޔާވެރި އަސްކަރިއްޔާ އާ ދެކޮޅަށް ވަރުގަދަ ހަމަލާތަކެއް ދެމުން ގެންދާ ހިޒްބުﷲ އިން މި ހަމަލާތައް ދިން ކަމަށް އިސްރާއީލުން ވެސް ވަނީ ބުނެފައެވެ.

ޔަހޫދީންގެ ޣައިރު ޤާނޫނީ ނަޖިސް ދައުލަތް އިސްރާއީލުގެ އުތުރުގައި ޔަހޫދީންގެ އަނިޔާވެރި އަސްކަރިއްޔާގެ އަމާޒުތަކަށް ވަރުގަދަ ހަމަލާތަކެއް ދީފައިވާނެ ކަމަށް ލުބުނާނުން ބުނެ އެކަން ވަނީ އިއުލާން ކޮށްފައެވެ. މި ގޮތުން އެ ޖަމާއަތުގެ ހަމަލާތައް މައިގަނޑު ގޮތެއްގައި އަމާޒުކޮށްފައި ވާނީ ޔަހޫދީންގެ އަސްކަރިއްޔާގެ އަސްކަރީ މަރުކަޒެއް ކަމަށްވާ މަސްކަފަމް އަށް ކަމަށެވެ.

މި ހަމަލާތައް އެ އަސްކަރީ މަރުކަޒަށް އަރާފައިވާ ކަމަށާއި ހަމަލާތަކުގެ ސަބަބުން އެ އަސްކަރީ މަރުކަޒުގެ އެކި ތަންތަނަށް ގެއްލުން ލިބިފައިވާ ކަމަށް ވެސް ޖަމާއަތުން ވަނީ ބުނެފައެވެ.

އިސްރާއީލްގެ އުތުރުގެ އަވަށެއް ކަމަށްވާ ޔާރާ ކައިރީގައި ޤާއިމްވެ ތިބި ޔަހޫދީންގެ އަނިޔާވެރި އަސްކަރިއްޔާގެ ސިފައިންނަށް އަމާޒުކޮށްގެން މިއަދު ޑުރޯން ހަމަލާތަކެއް ވެސް ދީފައިވާނެ ކަމަށް ލުބުނާންގެ ދެކުނުގެ ސަރަހައްދުގައި ހަރަކާތްތެރިވަމުންދާ ހިޒްބުﷲ ޖަމާއަތުން ވަނީ ބުނެފައެވެ.

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ އިސްރާއީލުން ފަލަސްތީނުގެ ކުށެއް ނެތް ރައްޔިތުންނާ ދެކޮޅަށް ހިންގަމުންދާ ލޯއޮހޮރުން ތަކުގައި އެތައް ހާސް ރައްޔިތުންނެއް ވަނީ ޝަހީދު ވެފައެވެ.