ބުޅާތައްވެސް މަރުވާ ނުރައްކާތެރި ބައްޔެއް އެމެރިކާގައި ފެތުރެން ފަށައިފިއެވެ.

’ސްޓޭގަރިންގ ޑިޒީޒް‘ ނަމަކަށް ކިޔާ އާ ވައިރަސް އެއް އެމެރިކާގެ އެކި ހިސާބުތަކުގައި ހަލުވިކަމާއެކު ފެތުރެމުންދާކަމަށް އެގައުމުގެ މީޑިޔާތަކުން ރިޕޯޓްކޮށްފިއެވެ. އެގޮތުން މި ވައިރަސް އަކީ ގޭގައި ގެންގުޅޭ ބުޅަލަށްވެސް މީގެ އަސަރު އިންތިހާއަށް ކުރާ އެއްޗެއް ކަމަށް ސިއްހީ މާހިރުން ވަނީ ބުނެފައެވެ.

ގެރި ގެންގުޅޭ ތަންތަނުގައި އެވިއަން އިންފްލުއެންޒާ ނުވަތަ އެޗް5އެން1 ގެ ނަމުން ނަންދެވިފައިވާ މި ވައިރަސް ފެތުރި އޭގެ ސަބަބުން ގެރިތައް މަރުވާތާ ދޮޅު އަހަރު މިވަނީ ވެފައެވެ. އަދި މިބަލި ފެތުރުން ހުއްޓުވަން މަސައްކަތްކުރަމުންދާއިރު، މިބަލީގެ ސަބަބުން 100 މިލިއަނަށްވުރެ ގިނަ ދޫނިވެސް އެމެރިކާގައި ވަނީ މަރުވެފައެވެ.

މާރިޗް މަހުގެ ފަހުކޮޅު ސައިންސްވެރިން ކަށަވަރުކޮށްދިން ގޮތުގައި އެޗް5އެން1 އަކީ އެމެރިކާގެ ގެރިތައް ގެންގުޅޭ ކިރު ފާމްތަކުގައި މިހާރު އާންމު އެއްޗެކެވެ. އޮގަސްޓް 15 ގެ ނިޔަލަށް 13 ސްޓޭޓެއްގައި އެތައް ސަތޭކަ ދޫންޏަކަށް މި ބަލީގެ އަސަރުކޮށްފައިވާއިރު އިންސާނުންނަށް މި ބަލި ޖެހޭ މިންވަރު ދަށެވެ. އެގޮތުން މި އަހަރުގެ އެޕްރީލް އިން އޮގަސްޓުގެ ނިޔަލަށް މި ބަލި ޖެހިގެން ރިޕޯޓްކޮށްފައި ވަނީ 13 މީހަކަށެވެ.

މިހާރު މި ވައިރަސް ފެންނަމުންދަނީ ބޭރުތެރޭގައި އުޅޭ ނުވަތަ ގޭގައި ގެންގުޅޭ ބުޅަލުންނެވެ. ކޮލޮރާޑޯ ޑިޕާޓްމަންޓް އޮފް ޕަބްލިކް ހެލްތުން އޮގަސްޓް މަހުގެ ނުވަ ވަނަ ދުވަހު އިއުލާން ކުރި ގޮތުގައި މި އަހަރު އެ ސްޓޭޓުން ހަ ބުޅަލަށް އިންފެކްޝަން ޖެހިގެން ވަނީ ރިޕޯޓްކޮށްފަ އެވެ.

ސައިންސްވެރިން ބުނާ ގޮތުގައި ޖަނަވާރުތަކުގައި މި ވައިރަސް ފެތުރި، އިންސާނުންގެ ދިރިއުޅުމަށް ވެސް އޭގެ ނޭދެވޭ އަސަރު ކޮށްފާނެ ކަމަކަށް މިހާރު ވެފައިވާ ކަމަށެވެ.