ގްރީސްގެ ވަށައިގެންވާ ކޯރުތައް މަރުވެފައިވާ މަސްތަކުން ފުރިފައިވާ ކަމަށް އެގައުމުގެ ކަމާބެހޭ އިދާރާތަކާ ހަވާލަދީ ބޭރުގެ މީޑިޔާތަކުން ހާމަކޮށްފިއެވެ.

ބޭރުގެ މީޑިޔާތަކުން ހާމަކޮށްފައިވާ ގޮތުގައި ގްރީސްގެ ވަށައިގެންވާ ގިނަ ކޯރުތަކުގައި އާދަޔާ ހިލާފަށް މަރުވެފައިވާ މަސްތައް ގިނަވެފައިވާއިރު ރައްޔިތުންނަށް ވަނީ ގިނަ ދަތިތަކާ ކުރިމަތިވެފައެވެ. އަދި މިކަމުގެ ސަބަބުން ސިއްހީގޮތުން ކުރިމަތިވެދާނެ ބަލިމަޑުކަމަކަށް ތައްޔާރުވުމުގެ ގޮތުގައި އެގައުމުގެ ސަރުކާރުން ވަނީ ގްރީސްގައި ކުއްލި ނުރައްކަލުގެ ހާލަތު އިއުލާންކޮށްފަ އެވެ

ބައެއް ރިޕޯޓްތައް ބުނާގޮތުގައި ހާއްސަކޮށް ގްރީސްގެ މެދުތެރޭގެ ބަނދަރު ސިޓީ ވޮލޮސްގެ ކޯރުތަކުގައި އެތައް ސަތޭކަ ޓަނެއްގެ މަރުވެފައިވާ މަސް ފެނުން މައްޗަށް އަރާފައިވަނީ މިދިޔަ އަހަރު ކުރިމަތިވި އުދައެރުމުގެ އަސަރުތަކުގެ ތެރެއިން ދިމާވި ކަމެއް ކަމަށް ބެލެވޭ ކަމަށެވެ.

ކަމާބެހޭ އިދާރާތަކުން ދަނީ ހުއްޓުމެއްނެތި ކޯރުތަކުން މަރުވެފައިވާ މަސް، ބުލްޑޯޒަރުތަކުން ނަގަމުންނެވެ. އެގައުމުގެ ތާޒާ ފެން ދައުރުވާ ގިނަ ކޯރުތަކުގައި މަސްތައް މަރުވެފައިވާއިރު މިއީ ކޯރުތައް ބޭނުން ކުރައްވާ ފަރާތްތަކަށް ގިނަ ދަތިތަކާ ކުރިމަތިވަމުންދާ ކަމެއްކަން ފާހަގަ ކުރެވެއެވެ،