ގިނަ އަދަދެއްގެ ދިވެހިންވެސް ދަތުރުކުރާ ނިއު ޒިލެންޑުން ފަތުރުވެރިންގެ އަތުން ނަގާ އިންޓަނޭޝަނަލް ވިޒިޓާ ލެވީ (އައިވީއެލް) ފީ ތިން ގުނަ އިތުރުކޮށްފިއެވެ.

ފަތުރުވެރިންގެ މަގުބޫލު މަންޒިލެއް ކަމަށްވާ ނިއު ޒީލެންޑަށް އެތެރެވާ ފަތުރުވެރިންގެ އަތުން ނަގާ ފީ އިތުރުކުރުމަށް އެ ގައުމުން ސަރުކާރުން ނިންމައި އެކަން މިއަދު އިއުލާންކޮށްފައިވާއިރު ސަރުކާރުން ބުނީ މިހާރު ފީއަކަށް ނަގަމުން އަންނަ 35 ނިއު ޒީލެންޑްގެ ޑޮލަރުގެ ބަދަލުގައި އަންނަ މަހުގެ އެކެކުން ފެށިގެން ނަގާނީ 100 ނިއު ޒީލޭންޑް ޑޮލަރު (81 އެމެރިކާ ޑޮލަރު) ކަމަށެވެ.

ފީ ބޮޑުކުރުމާ ގުޅޭގޮތުން ނިއު ޒިލެންޑު ސަރުކާރުން ބުނީ ފީ އަށް ގެންނަ ބަދަލާ އެކީ ނިއު ޒީލެންޑުން ފަތުރުވެރިންނަށް ލިބޭ ހިދުމަތްތައް އިތުރަށް ރަނގަޅު ވާނެ ކަމަށެވެ. އަދި މީގެ ސަބަބުން ފަތުރުވެރިން އެ ގައުމަށް ޒިޔާރަތްކުރާ އަދަދު މަދުނުވާނެކަމުގެ ޔަގީކަން ވެސް އޮތް ކަމަށް އެގައުމުގެ ސަރުކާރުން ބުންޏެވެ.

ފަތުރުވެރިންގެ އަތުން ނަގާ އައިވީއެލް ފީ، 35 ނިއު ޒީލެންޑްގެ ޑޮލަރު ނަގަން ފެށީ 2019 ގަ އެވެ. މި ފީ ބޮޑު ކުރަން ނިންމުމާ ގުޅިގެން ނިއު ޒިލެންޑްގެ ފަތުރުވެރިކަމާ ގުޅުންހުރި ޖަމާއަތްތަކުން މިހާރު ވަނީ ކަންބޮޑުވުން ފާޅުކުރަން ފަށައިފަ އެވެ. އެގޮތުން މިއީ ފަތުރުވެރިން ޒިޔާރަތްކުރާ އަދަދު މަދުވާނެ ކަމެއް ކަމަށް ދަނީ ބުނަމުންނެވެ.

ދުނިޔޭގެ އެހެން ހިސާބުތަކާ އަޅާބަލާ އިރު، ދުނިޔެއަށް ކުރިމަތި ކޮވިޑް-19 ގެ ބަލިމަޑުކަން އައި ފަހުން އަދިވެސް އެ ގައުމުގެ ފަތުރުވެރިކަމުގެ ސިނާއަށް، މާ ބޮޑު ކުރިއެރުމެއް އައިސްފައި ނުވާކަން ފާހަގަ ކުރެވެއެވެ. އަދި ފަތުރުވެރިން އެތެރެވާން ނަގާ ފީ ބޮޑު ކުރުމަކީ މީގެ ސަބަބުން ފަތުރުވެރިކަމުގެ ސިނާއަތަށް ނޭދެވޭ އަސަރު ކުރާނެ ކަމެއް ކަމަށް ދަނީ ބުނަމުންނެވެ.