ރަޝިޔާގެ ރައީސް ވްލަޑިމީރް ޕޫޓިން މޮންގޯލިއާއަށް ކުރައްވަމުން ގެންދަވާ ރަސްމީ ދަތުރުފުޅުގައި، އެ ޤައުމުން ޕޫޓިން ހައްޔަރުކޮށްފައިނުވާތީ ޔޫކްރެއިނުން މޮންގޯލިއާ ކުށްވެރިކޮށްފިއެވެ.

ރަޝިޔާއާއި ޔޫކްރެއިނާ ދެމެދު ވަރުގަދަ ހަމަލާތަކެއް ބަދަލުކުރެވެނުންދާ މި ދަނޑިވަޅުގައި، ޔޫކްރެއިނުން މޮންގޯލިއާގައި ޕޫޓިން ހައްޔަރުކުރުމަށް އެދުނު ނަމަވެސް، މޮންގޯލިއާ ސަރުކާރުން އެކަމަށް އިޖާބަ ނުދިނުމާ ގުޅިގެން ޔޫކްރެއިނުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ.

ޕޫޓިންގެ ދަތުރުފުޅުގެ ޚަބަރު ފެތުރެން ފެށުނީއްސުރެ، ޔޫކްރެއިނުން ގޮވާލަމުން ދިޔައީ މޮންގޯލިއާއަށް ޕޫޓިން ވަޑައިގަތުމުން ހައްޔަރުކުރުމަށެވެ. މޮންގޯލިއާއަކީ ބައިނަލްއަޤްވާމީ ޖިނާއީ ކޯޓުގެ (އައި.ސީ.ސީ) މެންބަރު ޤައުމަކަށް ވެފައި، އެ ކޯޓުން ފާއިތުވި އަހަރު ޕޫޓިން ހައްޔަރުކުރުމަށް އަމުރު ނެރެފައިވީ ނަމަވެސް، މޮންގޯލިއާއިން އެކަން ތަންފީޒުކޮށްފައި ނުވާކަން ޔޫކްރެއިނުން ވަނީ ފާހަގަކޮށްފައެވެ.

ރަސްމީ ދަތުރުފުޅެއްގައި ޕޫޓިން މޮންގޯލިއާއަށް ޒިޔާރަތްކުރެއްވުމުން، އެ ޤައުމުން ވަނީ ޕޫޓިންއަށް ރަތް ދޫލައިގެ ރަސްމީ މަރުޙަބާއެއް ދަންނަވާފައެވެ.

ޔޫކްރެއިނުގެ ޚާރިޖީ ވުޒާރާގެ ތަރުޖަމާނު ވިދާޅުވެފައިވަނީ، މޮންގޯލިއާއިން ޕޫޓިން ހައްޔަރުނުކުރަން ނިންމުމަކީ "އައި.ސީ.ސީ އާއި ބައިނަލްއަޤްވާމީ ޖިނާއީ ޢަދުލުގެ ނިޒާމަށް ލިބުނު ނުހަނު ބޮޑު ގެއްލުމެއް" ކަމަށެވެ.

ބައިނަލްއަޤްވާމީ ޖިނާއީ ކޯޓުން ވަނީ 2023 ވަނަ އަހަރުގެ މާރިޗު މަހު ޕޫޓިން ހައްޔަރުކުރުމަށް އަމުރެއް ނެރެފައެވެ. އެ އަމުރުގައި މޮންގޯލިއާ ހިމެނޭ ގޮތަށް ކޯޓުގެ 124 މެންބަރު ޤައުމަށް ލާޒިމްކޮށްފައިވަނީ، ރަޝިޔާގެ ރައީސް އެ ޤައުމުތަކުގެ ސަރަޙައްދަށް ވަޑައިގަތުމުން ހައްޔަރުކޮށް، ޝަރީޢަތަށް ހާޒިރުކުރުމަށެވެ.