އެމެރިކާގެ ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންގް އަދި ރަޝިޔާގެ ރައީސް ވްލަޑިމިއަރ ޕޫޓިން
އެމެރިކާގެ ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންގް އަދި ރަޝިޔާގެ ރައީސް ވްލަޑިމިއަރ ޕޫޓިން
އެމެރިކާގެ ރައީސް ޑޮނަލްޑް ޓްރަމްޕާއި، ޗައިނާގެ ރައީސް ޝީ ޖިންޕިންގް އަދި ރަޝިޔާގެ ރައީސް ވްލަޑިމިއަރ ޕޫޓިން ބައިވެރިވެވަޑައިގަންނަވާ ތާރީޚީ ފުރަތަމަ ތިންފަރާތުގެ (ޓްރައިލެޓަރަލް) ސަމިޓް ޗައިނާގެ ޝެންޒެންގައި ބޭއްވުމަށް ވަނީ ހަމަޖެހިފައެވެ. މި ސަމިޓުގައި ބައިވެރިވެވަޑައިގަތުމަށްޓަކައި ރައީސް ޓްރަމްޕް މިހާރު ވަނީ ޗައިނާއަށް ވަޑައިގެންފައެވެ.

އޭޝިއާ-ޕެސިފިކް އިކޮނޮމިކް ކޯޕަރޭޝަން (އެޕެކް) ސަމިޓުގެ ހަވާސާގައި ބާއްވާ މި ބައްދަލުވުމުގައި، ދުނިޔޭގެ ސަލާމަތާއި ރައްކާތެރިކަމާ ގުޅުންހުރި މުހިންމު ކަންކަމާމެދު މަޝްވަރާކުރެއްވުމަށް ވަނީ ހަމަޖެހިފައެވެ.

މި ދަތުރުފުޅުގެ ތެރެއިން އުތުރު ކޮރެއާގެ ލީޑަރު ކިމް ޖޮންގް އުންއާ ޓްރަމްޕް ކުއްލި ގޮތަކަށް ބައްދަލުކުރައްވާނެ ކަމާމެދު މިހާރު ވަނީ ސުވާލު އުފެދިފައެވެ.

މި ސަމިޓުގައި ނިއުކްލިއަރ ހަތިޔާރު މަދުކުރުމާއި، ޔޫކްރެއިން އަދި އީރާނުގެ މައްސަލަ ފަދަ ބައިނަލްއަޤްވާމީ ބޮޑެތި މައްސަލަތަކާމެދު މަޝްވަރާކުރެއްވުމަށް ޓްރަމްޕް ވަނީ ޝައުޤުވެރިކަން ފާޅުކުރައްވާފައެވެ.

ރަޝިޔާގެ އޮފިޝަލުންނާ ހަވާލާދީ ރިޕޯޓުތައް ބުނާގޮތުގައި، ސަމިޓަށްފަހު ގުޅިފައިވާ ބަޔާނެއް ނެރުމާމެދު މި ތިން ޤައުމުގެ މެދުގައި ދަނީ މަޝްވަރާކުރެވެމުންނެވެ. އަދި އެއްބަސްވުމަކަށް ނާދެވިއްޖެނަމަ، ކޮންމެ ޤައުމަކުން ވަކިން ބައްދަލުވުމުގެ ނަތީޖާ ހާމަކުރާނެ ކަމަށް ބެލެވެއެވެ. ތިން ޤައުމުގެ ސަމިޓުގެ ކުރިން، ޓްރަމްޕާއި ޝީ ޖިންޕިންގްގެ ވަކި ބައްދަލުވުމެއް ބޭއްވުމަށްވެސް ވަނީ ހަމަޖެހިފައެވެ. މި ބައްދަލުވުމުގައި ވިޔަފާރީގެ ޓެރިފްތަކާއި، ނާދިރު މަޢުދަންތައް އެކްސްޕޯޓްކުރުމުގެ އިތުރުން ޓެކްނޮލޮޖީގެ ދާއިރާއިން އަޅާފައިވާ ފިޔަވަޅުތަކާމެދު މަޝްވަރާކުރައްވާނެ ކަމަށް ލަފާކުރެވެއެވެ.

އުތުރު ކޮރެއާގެ ނިއުކްލިއަރ މައްސަލައަކީ މި ސަމިޓުގެ މައިގަނޑު އެޖެންޑާ ކަމުގައި ނުވި ނަމަވެސް، ބައިނަލްއަޤްވާމީ ސަލާމަތީ ކަންކަމުގެ ތެރެއިން އެކަމަށް އަލިއަޅުވާލައްވާނެ ކަމަށް ތަޖުރިބާކާރުން ދެކެއެވެ.

ޓްރަމްޕް އޭޝިއާއަށް ކުރައްވާ ދަތުރުފުޅުގައި ކިމްއާ ބައްދަލުކުރައްވަފާނެ ކަމުގެ އިޝާރާތެއް ދެއްވި ނަމަވެސް، ރަސްމީކޮށް އަދި އެފަދަ ބައްދަލުވުމެއް ކަށަވަރުވެފައެއް ނުވެއެވެ. މިކަމާ ގުޅިގެން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، ކިމްއާއެކު މަޝްވަރާތައް ކުރިއަށް ގެންދެވުމަށް ރައީސް ޓްރަމްޕް ވަރަށް ބޮޑަށް ބޭނުންފުޅުވާ ކަމަށެވެ.



ކިޔުންތެރިންގެ ހިޔާލު