އިސްރާއީލުން ފަލަސްތީނުގެ ޣައްޒާއަށް، ހަނގުރާމައީގެ ނަމުގައި ދެމުންގެންދާ ނިރުބަވެރި ޢުދުވާނީ ހަމަލާތަކުގެ ސަބަބުން ޣައްޒާގެ މިލިއަނެއްހާ މީހުން ތިބީ ބަނޑުހައިހޫނުކަމުގައި ކަމަށް އދ. އިން ބުނެފިއެވެ.

އދ. ތަރުޖަމާނު ސްޓެފެން ޑޫޖަރިކް ވިދާޅުވީ ޣައްޒާގެ މެދުތެރެއާއި ދެކުނުގެ ހިސާބުތަކުގައި ގާތްގަނޑަކަށް މިލިއަނެއްހާ ރައްޔިތުން ބަނޑުހައިހޫނުކަން ތަހައްމަލުކުރަން މަޖުބޫރުވެފައިވާ ކަމަށެވެ. އަދި އެހީދޭ ޖަމާއަތްތަކުން ދެމުންދާ އެހީތަށް އޮގަސްޓު މަހުގައި އެ ހިސާބުތަކުގައި ތިބި ރައްޔިތުންނަށް ލިބިފައި ނުވާކަމަށެވެ.

ކާބޯތަކެތި ނުލިބޭއިރު ޣައްޒާގެ ހެލްތު މިނިސްޓްރީން ބުނީ ޕޯލިއޯ ވެކްސިން ކެމްޕޭނާ ގުޅުން ހުރި މެޑިކަލް ޓީމުތައްވެސް އެ ސިޓީގެ ދެކުނުގެ ސަރަހައްދުތަކަށް ވަނުމަށް އިސްރާއީލުގެ އަސްކަރިއްޔާއިން ދެކޮޅު ހަދަމުންދާ ކަމަށެވެ.

ހަމާސްއިން ތުހުމަތު ކުރަނީ އިސްރާއީލުގެ ބޮޑުވަޒީރު ބިންޔާމިން ނެތަންޔާހޫ މިސްރާއި ޣައްޒާގެ ބޯޑަރުން ސިފައިން އެހެން ހިސާބަކަށް ބަދަލުކުރުމަށް ދެކޮޅު ހަދައިގެން ހަނގުރާމަ ހުއްޓާލުމުގެ އެއްބަސްވުން ނާކާމިޔާބު ވެފައިވާ ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި 40،878 މީހުން މަރުވެ 94،454 މީހުން ވަނީ ޒަޚަމްވެފައެވެ. އޮކްޓޯބަރު މަހުގެ ހަތް ވަނަ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި 1،139 މީހުން މަރުވެފައިވެ އެވެ.